Gatta Kusthi 2: "அந்த சீனுக்கு மட்டும் 1.2 கோடி செலவு பண்ணியிருக்கோம்!" - நடிகை ஐஸ்வர்யா லக்ஷ்மி

கடந்த 2022-ஆம் ஆண்டு, விஷ்ணு விஷால் - ஐஸ்வர்யா லக்ஷ்மி நடிப்பில் வெளியான 'கட்டா குஸ்தி' திரைப்படத்திற்கு நல்ல வரவேற்பு கிடைத்திருந்தது.

அப்படத்தின் வெற்றிக்குப் பிறகு, அதன் இரண்டாம் பாகத்தையும் முடித்து, இப்போது ரிலீஸுக்கும் தயார் செய்துவிட்டனர். ஜூலை 3-ஆம் தேதி இந்தப் படம் திரையரங்குகளில் வெளியாகிறது.

இப்படத்திற்காக நம் சினிமா விகடன் சேனலுக்கு விஷ்ணு விஷாலும், ஐஸ்வர்யா லக்ஷ்மியும் பேட்டியளித்திருக்கிறார்கள்.

அந்தப் பேட்டியில், 'கட்டா குஸ்தி' படத்தின் இண்டர்வெல் காட்சிக்கு 1.2 கோடி செலவு செய்ததாக ஐஸ்வர்யா லக்ஷ்மி குறிப்பிட்டிருக்கிறார்.

நடிகை ஐஸ்வர்யா லக்ஷ்மி, "'கட்டா குஸ்தி'யின் முதல் பாகத்தின் இண்டர்வெல் பகுதியில எனக்கு மாஸ் காட்சியை வச்சிருப்பாங்க. அந்தக் காட்சியைப் பற்றி சொல்லும்போதுதான் எனக்கு இன்னொரு விஷயமும் நினைவுக்கு வருது.

விஷ்ணு விஷால் சார் நடிச்ச, தயாரிச்ச படங்கள்ல, அதிகம் செலவழித்து எடுத்த சீன் அந்த இண்டர்வெல் காட்சிதான். கிட்டத்தட்ட அந்தக் காட்சிக்கு மட்டும் 1.2 கோடி செலவு பண்ணினோம். அது ஹீரோயினிக்காக எடுக்கப்பட்ட சீன்.

அந்த சீனை நானும் சின்னதாகத்தான் நினைச்சுட்டு இருந்தேன். ஆனால், இயக்குநர் செல்லா அய்யாவு சாரும், விஷ்ணு விஷால் சாரும் அந்த சீனை ரொம்ப பெருசா மாத்திட்டாங்க.

திரையரங்குகளில் அந்த சீனுக்கு பயங்கர க்ளாப்ஸ் கிடைச்சது. அது ஒட்டுமொத்த குழுவினுடைய முயற்சி. நான் வெறும் கதையை மட்டும் கேட்டேன். எனக்குப் பிடிச்சிருந்தது நடிச்சேன். இவங்களாலதான் காட்சிகள் இன்னும் பெரியதாக மாறுச்சு." எனப் பகிர்ந்துக் கொண்டார்.