திருப்பத்தூா்: ஆதரவற்ற பெண்களுக்கு மானிய விலையில் கோழிக்குஞ்சுகள்

கணவரை இழந்த, ஆதரவற்ற பெண்களுக்கு மானிய விலையில் கோழிக்குஞ்சுகள் வழங்கப்படும் என திருப்பத்தூா் ஆட்சியா் க.தா்ப்பகராஜ் தெரிவித்தாா்.

இது குறித்து அவா் வெளியிட்ட செய்திக் குறிப்பு:

கால்நடை பராமரிப்புத் துறை மூலம் , திருப்பத்தூா் மாவட்டத்தில் உள்ள 6 ஒன்றியங்களில் ஒன்றியத்துக்கு தலா 100 பயனாளிகள் வீதம் 600 பேருக்கு நாட்டு கோழிக்குஞ்சுகள் வழங்கப்பட உள்ளது. இதில், தோ்வு செய்யப்படும் பயனாளி ஏழ்மை நிலையிலுள்ள பெண்ணாக இருக்க வேண்டும். விதவைகள், ஆதரவற்றோா், மாற்றுத்திறனாளிகளுக்கு முன்னுரிமை அளிக்கப்படும். தோ்ந்தெடுக்கப்படும் பயனாளி அந்தக் கிராமத்தில் நிரந்தரமாக வசிப்பவராகவும், கோழி வளா்ப்பில் ஆா்வமுள்ளவராகவும் இருக்க வேண்டும்.

தமிழ்நாடு மாநில ஊரக வாழ்வாதார இயக்கத்தில் பதிவு செய்யப்பட்ட சுயஉதவிக் குழுக்களைச் சோ்ந்த பெண்களுக்கும் முன்னுரிமை அளிக்கப்படும்.

மேலும், தோ்வு செய்யப்படும் பயனாளி ரூ.3,200 சொந்த செலவில் நாட்டுக் கோழிக்குஞ்சுகள் கொள்முதல் செய்திடும் திறன் பெற்றவராக இருக்க வேண்டும்.

நாட்டுக் கோழிக்குஞ்சுகள் கொள்முதல் செய்து, அதற்கான சுயசான்றுடன் கூடிய ரசீது சமா்ப்பிக்கப்பட்டவுடன் 50 சதவீத மானியத் தொகையாக ரூ.1,600 அவரது வங்கிக் கணக்கில் செலுத்தப்படும்.

நெறிமுறைகளின்படி இத்திட்டத்தில் பயன்பெற விரும்பும் பெண்கள் அருகே உள்ள கால்நடை மருந்தக, கால்நடை உதவி மருத்துவரிடம் விண்ணப்பிக்கலாம் எனத் தெரிவிக்கப்பட்டுள்ளது.