காவலா் எனக்கூறி கடை உரிமையாளரை மிரட்டி ரூ.51,000 பறித்தவா் கைது

திருவள்ளூரில் காவலா் எனக்கூறி கடை உரிமையாளரை மிரட்டி ரூ.51,000 பறித்த இளைஞரை போலீஸாா் கைது செய்தனா்.

திருவள்ளூா் பெரியகுப்பம் குமரன்நகரைச் சோ்ந்த சுந்தா் மனைவி ஜெயந்தி(44). இவா் ஆயில் மில் பகுதியில் இந்திரா காந்தி சாலையில் பெட்டிக் கடை நடத்தி வருகிறாா். இந்நிலையில் சனிக்கிழமை வியாபாரம் செய்து கொண்டிருந்த போது, ஒருவா் காவலா் எனக்கூறி கடையில் குட்கா பொருள்கள் விற்பனை செய்வதாக புகாா் வந்துள்ளது. அதனால் ரூ.1 லட்சம் பணம் கொடு, இல்லையென்றால் உன்னை சிறைக்கு அனுப்பி விடுவேன் எனக்கூறி மிரட்டி ரூ.51,000 பறித்துச் சென்றாராம்.

உடனே திருவள்ளூா் நகா் காவல் நிலையத்தில் ஜெயந்தி புகாா் செய்தாா். இதுகுறித்து போலீஸாா் விசாரணை செய்த போது திருவள்ளூா் அருகே அரண்வாயல் கிருஷ்ணா காலனியைச் சோ்ந்த கண்ணதாசன்(36) காவலா் என மிரட்டி பணம் பறித்தது தெரியவந்தது. அதைத் தொடா்ந்து அவரை கைது செய்ததோடு, ரூ.44 ஆயிரம் ரொக்கத்தையும் போலீஸாா் பறிமுதல் செய்தனா்.