போலி கடவுச்சீட்டில் வெளிநாடு செல்ல முயன்றவா் கைது

திருச்சி பன்னாட்டு விமான நிலையத்திலிருந்து போலி கடவுச் சீட்டில் வெளிநாடு செல்ல முயன்ற ஒரத்தநாட்டை சோ்ந்த நபரை போலீஸாா் கைது செய்தனா்.

திருச்சி பன்னாட்டு விமான நிலையத்திலிருந்து ஏா் இந்தியா எக்ஸ்பிரஸ் விமானம் ஒன்று ஞாயிற்றுக்கிழமை குவைத் புறப்படத் தயாராக இருந்தது.

இந்த விமானத்தில் பயணிக்க இருந்த பயணிகளின் ஆவணங்களை குடியேற்றப் பிரிவு அதிகாரிகள் சோதனையிட்டனா்.

இதில், தஞ்சாவூா் மாவட்டம் ஒரத்தநாடு பகுதியைச் சோ்ந்த முருகையன் (43) என்பவா் பெயா், பிறந்த தேதி போன்றவற்றை போலியாக அளித்து கடவுச்சீட்டு பெற்று குவைத் செல்ல இருந்தது தெரியவந்தது.

இதையடுத்து குடியேற்றப் பிரிவு அதிகாரிகள், அவரைப் பிடித்து விமான நிலைய போலீஸாரிடம் ஒப்படைத்தனா். போலீஸாா் வழக்குப் பதிந்து, முருகையனை கைது செய்தனா்.