அரசு பல் மருத்துவமனையில் ரூ. 56 கோடியில் 4 தளங்கள் அமைக்க அனுமதி

சென்னை: சென்னையில் உள்ள அரசு பல் மருத்துவக் கல்லூரி மருத்துவமனை கட்டடத்தில் கூடுதலாக ரூ. 56.5 கோடியில் 4 தளங்கள் கட்டுவதற்கும், ரூ.7.59 கோடியில் உபகரணங்கள் வாங்குவதற்கும் தமிழக அரசு அனுமதி அளித்து அரசாணை பிறப்பிக்கப்பட்டுள்ளது.

இது தொடா்பாக வெளியிடப்பட்ட செய்திக் குறிப்பு:

சென்னையில் உள்ள தமிழ்நாடு அரசு பல் மருத்துவக் கல்லூரி, மருத்துவமனை, இந்தியாவின் மூன்றாவது பழைமையான பல் மருத்துவக் கல்லூரியாகும். அதுமட்டுமல்லாது, தென்னிந்தியாவின் முதல் அரசு பல் மருத்துவக் கல்லூரி. பல் மருத்துவம், ஆராய்ச்சி மற்றும் நோயாளி பராமரிப்பு ஆகியவற்றிலும் இந்தக் கல்லூரி சிறந்த மையமாக உள்ளது. இளநிலை மற்றும் முதுநிலை மருத்துவா்களின் திறன்கள் மற்றும் நிபுணத்துவத்தை வளா்ப்பதில் இந்சக் கல்லூரி முக்கிய பங்காற்றுகிறது.

தமிழ்நாடு அரசு பல் மருத்துவக் கல்லூரி மருத்துவமனைக்கு வரும் பயனாளிகள் மற்றும் மாணவா்களின் நலன் கருதி, ரூ. 56.5 கோடியில் தற்போதுள்ள கட்டடத்துடன், கூடுதலாக 4 தளங்கள் கட்ட தமிழக அரசு ஆணை வெளியிட்டுள்ளது. ஒரு தளத்துக்கு 33,600 சதுர அடி பரப்பளவு வீதம், மொத்தமாக 1,34,400 சதுர அடி கட்டடம் அமைக்கப்பட உள்ளது.

புதிதாக கட்ட இருக்கும் தளங்களுக்கு தேவையான உபகரணங்கள் மற்றும் 100 புதிய பல் மருத்துவ சிகிச்சை நாற்காலிகள் ரூ. 7.59 கோடியில் வாங்குவதற்கு தமிழக அரசு அனுமதி அளித்தது.

இந்த அனுமதி பல் கட்டும் துறை, வாய்வழி நோயியல், பொது சுகாதார பல் மருத்துவம், பல் ஈறு அறுவை சிகிச்சை துறை போன்ற துறைகளையும் வலுப்படுத்தும். கடந்த 3 ஆண்டுகளாக அரசு பல் மருத்துவக் கல்லூரிக்கு வருகைதரும் பயனாளிகளின் எண்ணிக்கை அதிகரித்து வருகிறது.

தமிழக அரசின் இந்த ஆணையின்படி அரசு பல் மருத்துவக் கல்லூரிக்கு வருகை தரும் ஆயிரக்கணக்கான பயனாளிகளின் தரமான பாதுகாப்பான பல் சிகிச்சை மேம்படும். இந்தக் கல்லூரியை இந்தியாவின் முதன்மையான பல் மருத்துவ கல்லூரியாக மாற்றுவதற்கான பயணத்தில் இது ஒரு மைல்கல் என்று அதில் தெரிவிக்கப்பட்டுள்ளது.