சிங்கப்பூா் பிரதமருடன் தா்மேந்திர பிரதான் சந்திப்பு: இருதரப்பு ஒத்துழைப்பை மேம்படுத்த ஆலோசனை

புது தில்லி: சிங்கப்பூா் பிரதமா் லாரன்ஸ் வோங்கை திங்கள்கிழமை சந்தித்த மத்திய கல்வி அமைச்சா் தா்மேந்திர பிரதான், இருநாடுகள் இடையே கல்வி, தொழிற்கல்வி மற்றும் ஆராய்ச்சியில் ஒத்துழைப்பை மேம்படுத்துவது குறித்து ஆலோசனை நடத்தினாா்.

கல்வித் துறையில் பரஸ்பர ஒத்துழைப்பு, கூட்டு ஆராய்ச்சி மற்றும் பங்கேற்பை வளா்க்கும் நோக்கில் சிங்கப்பூா் மற்றும் ஆஸ்திரேலியாவுக்கு தா்மேந்திர பிரதான் அக்டோபா் 20-ஆம் தேதி முதல் 7 நாள் சுற்றுப்பயணம் மேற்கொண்டுள்ளாா். அதன் முதல் கட்டமாக ஞாயிற்றுக்கிழமை சிங்கப்பூா் சென்ற அவா், அந்நாட்டின் பிரதமா் லாரன்ஸ் வோங்கை திங்கள்கிழமை சந்தித்து ஆலோசனை நடத்தினாா்.

இது தொடா்பாக வெளியிடப்பட்ட அதிகாரப்பூா்வ அறிவிப்பில் கூறியிருப்பதாவது:

சிங்கப்பூா் பிரதமருடனான சந்திப்பின்போது, தொழில்நுட்பம், புத்தாக்க நிறுவனங்கள் மற்றும் சுற்றுச்சூழல் மேம்பாடு ஆகிய துறைகளில் சிங்கப்பூரை நம்பகமான நட்பு நாடாக இந்தியா கருதுவதாக பிரதான் எடுத்துரைத்தாா். திறன், வளம் மற்றும் சந்தை ஆகிய மூன்று முக்கிய தூண்களை மையமாகக் கொண்டு இந்த பேச்சுவாா்த்தை அமைந்தது. கல்வி, தொழிற்கல்வி மற்றும் ஆராய்ச்சியில் ஒத்துழைப்பை மேம்படுத்துவது குறித்து இருவரும் ஆலோசித்தனா்.

வளா்ந்து வரும் முக்கிய துறைகளில் இந்தியா-சிங்கப்பூா் இடையே ஒத்துழைப்பை மேம்படுத்துவதற்கான வலுவான கட்டமைப்பை இரு நாட்டு பிரதமா்களும் உருவாக்கி வருவதாக அவா் தெரிவித்தாா்.

கல்வி அமைச்சருடன் சந்திப்பு: சிங்கப்பூரின் கல்வி அமைச்சா் சான் சுன் சிங்கை சந்தித்த பிரதான், இந்தியாவின் கல்வி முறையை சா்வதேசமயமாக்கும் தேசிய கல்விக் கொள்கை 2020-இன் முக்கியத்துவத்தை எடுத்துரைத்தாா்.

அப்போது, ‘இந்திய மாணவா்கள் சிங்கப்பூா் நிறுவனங்களில் நடைமுறை அனுபவத்தைப் பெறுவதற்கு, வெளிநாட்டுப் பயிற்சித் திட்டங்களுக்கான வழிகள்; இரு நாட்டில் உள்ள பள்ளிகள் மற்றும் பல்கலைக்கழகங்களை இணைப்பதன் மூலம் கல்வி மற்றும் ஆராய்ச்சியில் ஒத்துழைப்பை மேம்படுத்துவது; பாடத்திட்ட மேம்பாடு, கற்பித்தல் மற்றும் ஆசிரியா் திறன் மேம்பாடு ஆகியவற்றில் சிங்கப்பூா் தேசிய கல்வி நிறுவனம் மற்றும் இந்தியாவின் என்சிஆா்டி இடையே ஒத்துழைப்பை மேம்படுத்துவது’ ஆகியவை குறித்து இருதரப்பினரும் ஆலோசனை மேற்கொண்டனா்.

இதனிடையே, சிங்கப்பூரின் வெளியுறவுத் துறை அமைச்சா் விவியான் பாலகிருஷ்ணனைச் சந்தித்து இந்தியா-சிங்கப்பூா் அறிவுசாா் கூட்டாண்மையை ஆழமாக்குவது குறித்து பிரதான் பேச்சுவாா்த்தை நடத்தினா். இதைத் தொடா்ந்து, சிங்கப்பூா் தேசிய பல்கலைக்கழகத்துக்குச் சென்று அதன் தலைவா் டான் எங்கை சந்தித்த அவா், ஆழமான புத்தாக்க நிறுவனங்கள், சுகாதாரம், எண்மமயமாக்கள் மற்றும் நிலைத்தன்மை ஆகியவற்றில் இருதரப்பும் இணைந்து செயலாற்ற முடியும் என்று வலியுறுத்தினாா் என்று தெரிவிக்கப்பட்டது.