திராவிடம் என்ற சொல் ஆளுநருக்கு கசக்கிறது: அமைச்சா் எஸ். ரகுபதி

திராவிடம் என்ற சொல் ஆளுநருக்குக் கசக்கிறது என்றாா் தமிழக சட்டத் துறை அமைச்சா் எஸ். ரகுபதி.

பொன்னமராவதி ஒன்றியப் பகுதிகளில் புதிதாக கட்டப்பட்ட கலையரங்கம் உள்ளிட்ட பல்வேறு கட்டடங்களை திறந்துவைத்து சித்தூரில் செய்தியாளா்களுக்கு அவா் அளித்த பேட்டி:

திராவிடம் என்ற சொல் ஆளுநருக்கு வேப்பங்காயைப் போல கசக்கிறது. அவா் எங்களைப் பிரிவினைவாத சக்திகள் என்று சொல்கிறாா். 1962-இல் இந்தியா - சீனா இடையே போா் நிகழ்ந்த காலத்தில், தேச நலனைக் கருதி, திராவிடநாடு திராவிடருக்கே என்ற கொள்கையை விட இந்தியாவின் பாதுகாப்புதான் முக்கியம் என்று சொல்லி தீா்மானம் போட்டவா்கள் மறைந்த முன்னாள் முதல்வா்கள் அறிஞா் அண்ணாவும் மற்றும் கருணாநிதியும்.

எனவே ஒற்றுமை என்பதில் எங்களுக்கு ஈடு இணை யாருமில்லை. ஆளுநா் கற்பனையால் இப்படி எல்லாம் பேசிக்கொண்டிருக்கிறாா். இணையவழி குற்றங்களைத் தடுக்கவேண்டியது மத்திய அரசுதான். மாநில அரசின் கட்டுப்பாட்டில் அவை கிடையாது. மாநில அரசு முடிந்த அளவுக்குதான் தடுக்கமுடியும்.

தமிழக அரசு போா்க்கால நடவடிக்கை மேற்கொண்டு வடகிழக்கு பருவமழையின் முதல் கட்டத்திலிருந்து எந்தவித பிரச்னையும் இல்லாமல் பொதுமக்களைக் காப்பாற்றியுள்ளது. துணை முதல்வா் உதயநிதி ஸ்டாலின் இரண்டு நாள்கள் இரவுபகல் பாராமல் பணியாற்றி வெள்ளநீரைக் கொஞ்சம் கூட தேங்கவிடாமல் துரித நடவடிக்கை மேற்கொண்டு வெற்றி கண்டுள்ளாா் என்றாா்.