Salman Khan: `சல்மான் கான் மன்னிப்பு கேட்டால்...' - 25 ஆண்டு பகைக்கு பிஷ்னோய் சமூகம் புதிய தீர்வு!

பாலிவுட் நடிகர் சல்மான் கான் கடந்த 1998-ம் ஆண்டு ராஜஸ்தானுக்கு படப்பிடிப்புக்குச் சென்றபோது அங்கு அபூர்வ வகை மானை வேட்டையாடியதாக தெரிகிறது. அந்த வகை மான்களை வடமாநிலங்களில் வாழும் பிஷ்னோய் இன மக்கள் தெய்வமாக கருதுவதாக கூறப்படுகிறது. மான்களை வேட்டையாடியதற்காக சல்மான் கான் கைது செய்யப்பட்டு சிறையில் அடைக்கப்பட்டார். சல்மான் கானுக்கு எதிராக பிஷ்னோய் இன மக்கள் போராட்டம் நடத்தினர். சல்மான் கானுக்கு இவ்வழக்கில் கோர்ட் 20 ஆண்டுகளுக்குப் பிறகு 2018ம் ஆண்டு 5 ஆண்டுகள் சிறைத் தண்டனை வழங்கியது. இவ்வழக்கில் சல்மான் கான் கோர்ட் மூலம் வெளியில் வந்தார். இதையடுத்து டெல்லி மாஃபியா கும்பல் தலைவர் லாரன்ஸ் பிஷ்னோயும் நடிகர் சல்மான் கான் மான்களை வேட்டையாடியதற்காக மன்னிப்பு கேட்கவேண்டும் என்று கோரிக்கை விடுத்தார்.

ஆனால் சல்மான் கான் மன்னிப்பு கேட்கவில்லை. இதையடுத்து லாரன்ஸ் பிஷ்னோய் தொடர்ந்து சல்மான் கானுக்கு மிரட்டல் விடுத்துக்கொண்டிருக்கிறார். அதோடு சல்மான் கானை ஆள் அனுப்பி கொலை செய்யவும் முயற்சி மேற்கொண்டார். சல்மான் கான் வீட்டிலும் துப்பாக்கிச்சூடு நடத்தினர். சமீபத்தில் மும்பையில் நடிகர் சல்மான் கானுக்கு மிகவும் நெருக்கமான முன்னாள் அமைச்சர் பாபா சித்திக்கை லாரன்ஸ் பிஷ்னோய் ஆட்கள் துப்பாக்கியால் சுட்டுக் கொலைசெய்தனர். இதனால் சல்மான் கானுக்கு வழங்கப்படும் பாதுகாப்பு மேலும் அதிகரிக்கப்பட்டுள்ளது.

இந்நிலையில் இப்பிரச்னைக்கு தீர்வு காண பிஷ்னோய் இன தலைவர்கள் முன்வந்துள்ளனர். இது தொடர்பாக தேசிய பாரதிய பிஷ்னோய் மகாசபை தலைவர் தேவேந்திர புதியா அளித்த பேட்டியில், ''நடிகர் சல்மான் கான் எங்களது இடத்திற்கு வந்து தவறை ஒப்புக்கொண்டு மன்னிப்பு கேட்கவேண்டும். அப்படிக் கேட்டால் அவரை மன்னிப்பது குறித்து எங்களது சமுதாய தலைவர்கள் ஒன்று கூடி அவருக்கு மன்னிப்பு கொடுப்பது குறித்து முடிவு செய்வார்கள். எங்களது மத குரு ஜம்பேஷ்வரின் 29 விதிகளில் 10-வது விதியில் மன்னிப்பது குறித்து தெரிவித்துள்ளார். யாராவது தவறு செய்தால் அதற்காக அவர் மனப்பூர்வமாக மன்னிப்பு கேட்டால், மன்னித்துவிடுவோம். எங்களது சமுதாயம் யாருக்கும் தீங்கு விளைவிக்காது'' என்று தெரிவித்தார்.

ஆனால் சல்மான் கான் மன்னிப்பு கேட்பாரா என்று தெரியவில்லை. சல்மான் கான் தனது நெருங்கிய நண்பரை பறிகொடுத்துள்ளார். சல்மான் கான் பாதுகாப்புக்கு இடையே தனது சிகந்தர் படத்தின் படப்பிடிப்பை தொடங்க முடிவு செய்துள்ளார். அடுத்த வாரம் இந்த படப்பிடிப்பு தொடங்க இருக்கிறது. படப்பிடிப்பு நடக்கும் இடத்தில் கூடுதல் பாதுகாப்பு போடவும், ஆட்களின் எண்ணிக்கையை குறைக்கவும் முடிவு செய்யப்பட்டுள்ளது. அடுத்தகட்டப் படப்பிடிப்பை ஐதராபாத்தில் நடத்த முடிவு செய்யப்பட்டுள்ளது. மேலும் ஏற்கெனவே படப்பிடிப்பு நடத்த திட்டமிடப்பட்ட பகுதியை மாற்றவும் முடிவு செய்திருப்பதாக சல்மான் கானுக்கு நெருக்கமானவர்கள் தெரிவிக்கின்றனர்.