திடீர் மழைக்கு காரணம்.. இதுதான்! மதுரை ஆதினம்

மக்களிடையே பக்தி குறைந்ததே திடீர் மழைக்குக் காரணம் என மதுரை ஆதினம் தெரிவித்துள்ளார்.

கடந்த இரு நாள்களாக தமிழகத்தின் பல்வேறு மாவட்டங்களில் கனமழை கொட்டித்தீர்த்தது. குறிப்பாக சென்னை உள்ளிட்ட புறநகர்ப் பகுதியில் செவ்வாய்க்கிழமை முழுவதும் இடைவெளி விட்டு விட்டு கனமழை பெய்தது. இதனால் மக்களின் இயல்பு வாழ்க்கை பாதிக்கப்பட்டது. காய்கறி உள்ளிட்ட அத்தியாவசிய பொருள்களின் விலை பல மடங்காக உயர்ந்தது.

தென்மேற்கு வங்கக்கடல் பகுதியில் உருவாகியுள்ள ஆழ்ந்த காற்றழுத்த தாழ்வு மண்டலம் புதுச்சேரிக்கும் நெல்லூருக்கு இடையே சென்னை அருகே வியாழக்கிழமை அதிகாலை கரையைக் கடக்கக்கூடும் என வானிலை ஆய்வு மையம் தெரிவித்துள்ளது.

இதனால், சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் இன்று(அக்.16) கனமழை பெய்யும் என வானிலை ஆய்வு மையம் எச்சரித்துள்ளது.

இந்த நிலையில், மதுரை ஆதினம் செய்தியாளர்களுடன் சந்திப்பில் கூறியதாவது,

மக்களிடையே பக்தி குறைந்ததே திடீர் கனமழைக்குக் காரணம். மழை நீர் தேங்கிய இடங்களில் மீட்பு மற்றும் நிவாரணப் பணிகளை தமிழக அரசு சிறப்பாகச் செய்து வருகின்றது.

ஆதின நில குத்தகைத் தொகையை முறையாக தராததால் பருவம் தவறி மழை பெய்கிறது என்றும் அவர் தெரிவித்துள்ளார்.