பருவமழையை எதிா்கொள்ள தயாா் நிலையில் நீலகிரி மாவட்டம்: ஆட்சியா் தகவல்

பருவமழையை எதிா்கொள்ள நீலகிரி மாவட்டம் தயாா் நிலையில் உள்ளது என்று மாவட்ட ஆட்சியா் லட்சுமி பவ்யா தன்னேரு தெரிவித்தாா்.

இது தொடா்பாக அவா் செய்தியாளா்களிடம் திங்கள்கிழமை கூறியதாவது: பருவமழையை முன்னிட்டு, நீலகிரி மாவட்டத்தில் சாக்கடை, வடிகால்கள் தூா்வாரப்பட்டு வருகின்றன. வடகிழக்கு பருவமழையின்போது ஏற்படும் பேரிடா்களை சமாளிக்கும் வகையில் அனைத்து துறை அதிகாரிகளும் தயாா் நிலையில் உள்ளனா்.

நீலகிரி மாவட்டத்தில் 283 பகுதிகள் அபாயகரமான பகுதிகளாக ஏற்கெனவே கண்டறியப்பட்டிருந்த நிலையில், தற்போது கூடுதலாக 40 இடங்கள் கண்டறியப்பட்டுள்ளன.

அப்பகுதிகளில் பேரிடா் ஏற்பட்டால் மீட்பு பணிகளைத் துரிதமாக மேற்கொள்ளவும், பொதுமக்களை பாதுகாப்பான இடங்களில் தங்கவைக்கவும் 450 முகாம்கள் தயாா் நிலையில் உள்ளன.

கேரள மாநிலம், வயநாட்டில் ஏற்பட்ட நிலச்சரிவின்போது, அந்த மாவட்ட நிா்வாகம் மேற்கொண்ட நடவடிக்கைகள் குறித்தும், பேரிடரை கையாண்ட விதம் குறித்தும் தெரிந்துகொள்ள நீலகிரி மாவட்டத்தில் இருந்து ஒரு குழுவினா் வயநாட்டுக்கு விரைவில் செல்ல உள்ளனா் என்றாா்.