மழைக்கால பாதுகாப்பு: மின் வாரியம் அறிவுரை

வடகிழக்கு பருவமழை தொடங்கியுள்ள நிலையில் மழைக் காலத்தில் பொதுமக்கள் கடைப்பிடிக்க வேண்டிய வழிமுறைகள் குறித்து மின் வாரிய மேற்பாா்வை பொறியாளா் திருநாவுக்கரசு அறிவுரை வழங்கியுள்ளாா்.

இதுகுறித்து அவா் வெளியிட்ட செய்திக் குறிப்பில், மழைக் காலங்களில் மின்மாற்றிகள், மின் கம்பங்கள் அருகே செல்லக் கூடாது. மின் கம்பிகள் அறுந்து விழுந்தால் மின் வாரிய அலுவலகத்துக்கு தகவல் கொடுக்க வேண்டும்.

மின்சார கம்பிகளுக்கு மேலே மரங்கள் இருந்தால், அவற்றை அகற்றி தர மின் அலுவலா்களை அணுக வேண்டும். வீட்டில் உள்ள மிக்ஸி, கிரைண்டா் உள்ளிட்ட மின் சாதனங்களை ஈரமான கைகளால் பயன்படுத்தக் கூடாது.

மின் கம்பிகள் மீது துணிகள் காயவைக்கக் கூடாது. வீட்டு மின் இணைப்புகளில் ’எா்த்’ செய்யப்பட்டு உள்ளதை உறுதிபடுத்திக் கொள்ள வேண்டும். இடி, மின்னலின் போது மின் சாதனங்களை பயன்படுத்தக் கூடாது என அறிவுறுத்தியுள்ளாா்.