Salman Khan: "ரூ. 5 கோடி கொடுக்காவிட்டால்...." - சல்மான் கானுக்கு பிஷ்னோய் கேங்க் கொலை மிரட்டல்

பாலிவுட் நடிகர் சல்மான் கானுக்கு கடந்த ஒரு ஆண்டுக்கும் மேலாகத் தொடர்ந்து கொலை மிரட்டல் வந்து கொண்டிருக்கிறது. இக்கொலை மிரட்டல் காரணமாக சல்மான் கான் தொடர்ந்து பலத்த பாதுகாப்புடனேயே வெளியில் வருகிறார். அதோடு மும்பை காவல்துறையும் சல்மான் கானுக்கு பாதுகாப்பை அதிகரித்துள்ளனர்.

கடந்த வாரம் சல்மான் கானின் நெருங்கிய நண்பரும், மகாராஷ்டிரா முன்னாள் அமைச்சருமான பாபா சித்திக் மும்பையில் அவரது மகன் அலுவலகத்திற்கு வெளியில் படுகொலை செய்யப்பட்டார். சல்மான் கானுக்கு கொலை மிரட்டல் விடுத்து வந்த லாரன்ஸ் பிஷ்னோய் கூட்டத்தினர்தான் இந்த படுகொலையை நடத்தியதாக காவல்துறை விசாரணையில் தெரிய வந்துள்ளது. தற்போது சல்மான் கானுக்கு மீண்டும் கொலை மிரட்டல் வந்துள்ளது.

மும்பை போக்குவரத்து காவல் துறையின் வாட்ஸ் ஆப் நம்பருக்கு இந்த மிரட்டல் வந்துள்ளது. அதில், "சல்மான் கான் உடனே 5 கோடி ரூபாய் கொடுக்கவில்லையெனில், பாபா சித்திக்கிற்கு ஏற்பட்டதைவிட மோசமான நிலை அவருக்கு ஏற்படும். இந்த செய்தியைச் சாதாரணமாக எடுத்துக்கொள்ளவேண்டாம்." என்று எச்சரிக்கை விடப்பட்டுள்ளது. இது குறித்து காவல்துறை விசாரணை நடத்தி வருகின்றனர்.

ஏற்கனவே சல்மான் கான் வீட்டின் மீது மர்ம நபர்கள் கடந்த ஏப்ரல் மாதம் துப்பாக்கிச் சூடு நடத்தினர். அதன்பிறகு சல்மான் கானை அவரது பண்ணை வீட்டில் வைத்து கொலை செய்யவும் சதி நடந்தது. இச்சதி தொடர்பாக ஏற்கனவே 5 பேர் கைது செய்யப்பட்டு இருந்தனர். மேலும், சுக்பிர் பல்பிர் சிங் என்பவரை காவல்துறையினர் தேடி வந்தனர். சுக்பிர் பல்பிர் சிங் ஹரியானா மாநிலம் பானிபட் என்ற இடத்தில் பதுங்கி இருப்பதாகக் கிடைத்த தகவலைத் தொடர்ந்து, நவிமும்பை காவல்துறையினர் விரைந்து சென்று அவரைக் கைது செய்தனர். சுக்பிர் பல்பிர் சிங்கிடம் பாபா சித்திக் படுகொலை செய்யப்பட்டது தொடர்பாக விசாரணை நடத்தவும் திட்டமிட்டுள்ளனர்.

ஏற்கனவே கைது செய்யப்பட்டவர்களிடம் நடத்திய விசாரணையில் சல்மான் கான் வீட்டையும், அவரையும் கண்காணிக்க லாரன்ஸ் பிஷ்னோய் 60 பேரை வேலைக்கு நியமித்திருந்தது தெரிய வந்தது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://bit.ly/3PaAEiY

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3PaAEiY