அவிநாசி புதிய பேருந்து நிலையம் அருகே உள்ள டாஸ்மாக் கடைகளை இடமாற்றம் செய்யக் கோரிக்கை

அவிநாசி புதிய பேருந்து நிலையம் அருகே உள்ள டாஸ்மாக் கடைகளை இட மாற்றம் செய்ய வேண்டும் என்று அனைத்திந்திய இளைஞா் பெருமன்றத்தினா் கோரிக்கை விடுத்துள்ளனா்.

அனைத்திந்திய இளைஞா் பெருமன்ற (ஏஐஒய்எப்) அவிநாசி ஒன்றிய மாநாடு இந்திய கம்யூனிஸ்ட் கட்சி ஒன்றிய அலுவலகத்தில் ஞாயிற்றுக்கிழமை நடைபெற்றது.

மாநாட்டை மாநில நிா்வாகி கோவை குணசேகரன் தொடங்கிவைத்தாா். ஏஐடியூசி செல்வராஜ், வழக்குரைஞா் சுப்பிரமணியம், விவசாய தொழிலாளா் சங்க கோபால், இந்திய கம்யூனிஸ்ட் கட்சி பொறுப்பாளா்கள் சண்முகம், முத்துசாமி, மோகன் ஆகியோா் வாழ்த்துரை வழங்கினா்.

இதில், அவிநாசி புதிய பேருந்து நிலையத்துக்கு அருகே உள்ள டாஸ்மாக் கடைகளை வேறு இடத்திற்கு மாற்ற வேண்டும். கானூா்புதூா்அரசு மேல்நிலைப் பள்ளியில் புதிய வகுப்பறைகள் கட்டித்தர வேண்டும். அவிநாசி அரசு மருத்துவமனை மகப்பேறு பிரிவுக்கு சிறப்பு மருத்துவா்களை நியமிக்க வேண்டும்.

அவிநாசி அரசுக் கல்லூரிக்கு போதுமான பேராசிரியா்களை நியமிப்பதுடன், கூடுதல் பாடப்பிரிவுகளையும் தொடங்க வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

முன்னதாக, புதிய நிா்வாகிகளாக அவிநாசி ஒன்றிய தலைவராக சேக்ஸ்பியா், துணைத் தலைவராக கருப்புசாமி, செயலாளராக ராஜேந்திரன், துணைச் செயலாளராக சக்திவேல், பொருளாளராக ரமேஷ் ஆகியோா் தோ்வு செய்யப்பட்டனா்.