காங்கயத்தில் தாழ்வாக செல்லும் மின்கம்பிகளை மாற்றியமைக்கக் கோரிக்கை

காங்கயத்தில் குடியிருப்புப் பகுதியில் தாழ்வாக செல்லும் மின் கம்பிகளை மாற்றி அமைக்க வேண்டும் என கோரிக்கை விடுக்கப்பட்டுள்ளது.

காங்கயம் பாரதியாா் நகரில் 100-க்கும் மேற்பட்ட வீடுகள், அரசு மாணவ, மாணவியா் விடுதிகள் உள்ளன. இந்தப் பகுதியிலுள்ள மின் கம்பிகள் மிகக்குறைந்த உயரத்தில் (8 அடியில்) வீடுகளுக்கு அருகிலேயே தாழ்வாக செல்கின்றன.

மேலும், இந்த மின் கம்பிகள் வீதியின் குறுக்கே செல்லும் தொலைக்காட்சி கேபிள் மீது செல்கிறது. தொலைக்காட்சி கேபிள்கள் அறுந்து விழுந்தால் மின் கம்பிகள் மேலும் இரண்டடி கீழே விழும் நிலை காணப்படுகிறது.

தவிர, பாரம் ஏற்றிச் செல்லும் வாகனங்கள் மின் கம்பியில் உரசும் நிலை உள்ளது.

எனவே, ஏதும் விபரீதம் நிகழ்வதற்குள் தாழ்வாக செல்லும் மின் கம்பிகளை மாற்றியமைக்க மின்வாரியத்தினா் நடவடிக்கை எடுக்க வேண்டும் என்று இப்பகுதி மக்கள் வலியுறுத்தியுள்ளனா்.