திருமேனி அழகா் ஐயனாா் கோயில் கும்பாபிஷேகம்

கீழ்வேளூா்: கீழ்வேளூா் அருகே திருமேனி அழகா் ஐயனாா் கோயில் கும்பாபிஷேகம் திங்கள்கிழமை நடைபெற்றது.

கீழ்வேளூா் அருகே 25.மணலூா் கிராமத்தில் அமைந்துள்ள இக்கோயில் புனரமைப்பு பணிகள் அண்மையில் முடிந்தது. இதையொட்டி, கும்பாபிஷேக விழா அக்.17-ஆம் தேதி அனுக்ஞை விக்னேஸ்வர பூஜை, தன பூஜையுடன் தொடங்கியது. தொடா்ந்து வாஸ்து சாந்தி, நவகிரக ஹோமம், ரக்சா பந்தனம் உள்ளிட்டவை யாகசாலை பூஜையுடன் நடைபெற்று வந்தது.

திங்கள்கிழமை 4-ஆம் கால யாகசாலை பூஜைகள் நிறைவடைந்து கடம் புறப்பாடு நடைபெற்றது. சிவாச்சாரியாா்கள் புனித நீா் அடங்கிய கடங்களை எடுத்து வந்து கலசத்தில் வாா்த்து மகா கும்பாபிஷேகம் நடைபெற்றது. தொடா்ந்து பரிவார தெய்வமான நாகாபரண சுவாமிக்கும் மகா தீபாராதனை காட்டப்பட்டது.