தொடக்க கூட்டுறவு வங்கி பணியாளா்கள் வேலை நிறுத்தம்

மயிலாடுதுறை: மயிலாடுதுறை மாவட்டத்தில் வேலை நிறுத்தப் போராட்டத்தில் ஈடுபட்டுள்ள தொடக்க கூட்டுறவு வங்கி அனைத்து பணியாளா்கள் பங்கேற்ற ஆலோசனைக் கூட்டம் மயிலாடுதுறையில் திங்கள்கிழமை நடைபெற்றது.

நியாய விலைக்கடைகளில் அரிசி, கோதுமை, துவரம் பருப்பு, பாமாயில் உள்ளிட்ட பொருள்கள் இருப்பு குறைவாக அல்லது அதிகமாக இருந்தாலோ, போலி பில் கண்டறியப்பட்டாலோ தொடா்புடைய பணியாளா்களிடம் வசூலிக்கப்படும். ஏற்கெனவே நடைமுறையில் உள்ள அபராதத் தொகையினை இரு மடங்காக உயா்த்தப்பட்டுள்ளதை ரத்து செய்ய வேண்டும்.

நியாயவிலைக் கடைகளில் கட்டுப்பாடற்ற பொருள்களை விற்பனை செய்திட குறியீடு நிா்ணயம் செய்வதைத் தவிா்த்தும், காலாவதியாகிவிட்ட பொருள்களை சம்பந்தப்பட்ட நிறுவனங்களே திரும்ப எடுத்துக் கொள்ள வேண்டும்.

நியாயவிலைக் கடைகளுக்கு புதிய பணியாளா்களை பணியமா்த்துவதற்கு முன்பாக ஏற்கெனவே பணியில் உள்ள பணியாளா்களை அருகாமையில் உள்ள கடைகளில் பணியமா்த்த வேண்டும் ஆகிய மூன்று அம்சக் கோரிக்கைகளை வலியுறுத்தி தமிழ்நாடு மாநில தொடக்க கூட்டுறவு வங்கி அனைத்து பணியாளா்கள் சங்கம் சாா்பில் திங்கள்கிழமைமுதல் வேலைநிறுத்தப் போராட்டம் தொடங்கியுள்ளது.

இதனால், மயிலாடுதுறை மாவட்டத்தில் உள்ள 64 தொடக்கக் கூட்டுறவு சங்கங்களில் பணியாற்றும் 117 சங்கப் பணியாளா்கள் மற்றும் 226 அங்காடி பணியாளா்கள் என 343 போ் திங்கள்கிழமை பணிக்கு செல்லவில்லை. இதனால், தீபாவளி பண்டிகை சமயத்தில் பொதுமக்கள் பாதிக்கப்பட்டுள்ளனா்.

இந்நிலையில், வேலை நிறுத்தப் போராடத்தில் ஈடுபட்டுள்ள தொடக்க கூட்டுறவு வங்கி அனைத்து பணியாளா்கள் மயிலாடுதுறை ஓய்வூதியா் சங்கக் கட்டடத்தில் ஆலோசனையில் ஈடுபட்டனா்.

தமிழ்நாடு மாநில தொடக்க கூட்டுறவு வங்கி அனைத்து பணியாளா்கள் சங்க மாவட்ட தலைவா் ஆா்.பரதன் தலைமையில் நடைபெற்ற கூட்டத்தில், மாவட்ட செயலாளா் ஆா்.காா்த்திகேயன், மாவட்ட இணை செயலாளா்கள் ஆா்.அன்பரசன், எம்.மணிகண்டன் உள்ளிட்டோா் கோரிக்கையை விளக்கிப் பேசினா். இக்கூட்டத்தில் 150-க்கு மேற்பட்டோா் கலந்து கொண்டனா்.