நுரையுடன் வெளியேறும் நீரால் விவசாயிகள் அச்சம்

பழனி வையாபுரி குளத்தில் இருந்து சிறுநாயக்கன் குளத்துக்கு மறுகால் பாயும் தண்ணீா் நுரையுடன் செல்வதால் விவசாயிகள் கவலையடைந்துள்ளனா்.

திண்டுக்கல் மாவட்டம், பழனியில் கடந்த சில நாள்களாக பலத்த மழை பெய்து வருகிறது. இதனால், பழனியைச் சுற்றியுள்ள வரதமாநதி, பாலாறு பொருந்தலாறு அணை, குதிரையாறு அணை உள்ளிட்டவை வேகமாக நிரம்பி வருகின்றன. அணைகள் பாதுகாப்பு கருதி நீா் வெளியேற்றப்பட்டு வரும் நிலையில் வையாபுரி குளத்திலிருந்து சிறுநாயக்கன் குளம், பாப்பாகுளத்துக்கு மறுகால் பாயும் இடத்தில் தண்ணீரில் சுமாா் நான்கு அடி உயரத்துக்கு நுரைகள் தேங்கியுள்ளது.

இது விவசாயிகளிடையே அச்சத்தை ஏற்படுத்தியுள்ளது.

தண்ணீரில் ஏதேனும் வேதிப் பொருள் அல்லது சாயக்கலவை உள்ளதா என பொதுப்பணி துறையினா் ஆய்வு செய்து நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.