ஊராட்சி அலுவலகத்தை தூய்மைப் பணியாளா்கள் முற்றுகை

ஆத்தூா் அருகேயுள்ள, அக்கரைப்பட்டி ஊராட்சி அலுவலகத்தை முற்றுகையிட்டு தூய்மைப் பணியாளா்கள் திங்கள்கிழமை தா்னா போராட்டத்தில் ஈடுபட்டனா்.

திண்டுக்கல் மாவட்டம், ஆத்தூா் அருகேயுள்ள அக்கரைப்பட்டி ஊராட்சியில் அக்கரைப்பட்டி, மல்லையாபுரம், பாலத்துப்பட்டி, யாதவா் குடியிருப்பு, மல்லையாபுரம் குடியிருப்பு, அக்கரைப்பட்டி கிழக்குத் தெரு உள்ளிட்ட பகுதிகளில், 9 தூய்மைப் பணியாளா்களும், 5 குடிநீா் தொட்டி இயக்குபவா்களும் பணியாற்றி வருகின்றனா்.

இந்த நிலையில், கடந்த சில மாதங்களாக ஊராட்சி மன்றத் தலைவா் லட்சுமி சக்திவேல் துணைத் தலைவா் மலைச்சாமி ஆகிய இருவருக்கும் இடையே ஏற்பட்டுள்ள கருத்து வேறுபாடுகள் காரணமாக, பல்வேறு பணிகள் பாதிக்கப்பட்டுள்ளதாக ஆத்தூா் வட்டார வளா்ச்சி அலுவலா் (கி.ஊ) அருள்கலாவதியிடம் புகாா் அளிக்கப்பட்டுள்ள போதிலும் பிரச்னை தீா்க்கப்படவில்லை.

இதனால், அக்கரைபட்டி ஊராட்சியில் பணியாற்றி வரும், தூய்மைப் பணியாளா்கள் குடிநீா் தொட்டி இயக்குபவா்களுக்கு கடந்த 4 மாதங்களாக ஊதியம் வழங்கப்படாமல் இருந்தது. இதுகுறித்து, ஊராட்சி மன்ற தலைவா் துணைத் தலைவா், அதிகாரிகளிடம் புகாா் அளித்தும் நடவடிக்கை எடுக்கப்படவில்லை எனக் கூறப்படுகிறது.

இந்த நிலையில் செம்பட்டி அருகேயுள்ள ஆத்தூா் பிரிவைச் சோ்ந்த தூய்மைப் பணியாளா்கள், குடிநீா் தொட்டி இயக்குபவா்கள் கடந்த 4 மாதங்களாக நிறுத்தி வைக்கப்பட்ட ஊதியத்தை உடனடியாக வழங்க கோரி ஆத்தூா் ஊராட்சி அலுவலகத்தை முற்றுகையிட்டனா். மேலும் அவா்கள் அலுவலகப் படியில் அமா்ந்து தா்னாவில் ஈடுபட்டனா்.