புதுகையில் ‘சிக்கன் ரோல்’ சாப்பிட்ட 5 பேருக்கு திடீா் உடல் நலக்குறைவு

புதுக்கோட்டை அசைவ உணவகத்தில் ‘சிக்கன் ரோல்’ சாப்பிட்ட ஒரே குடும்பத்தைச் சோ்ந்த 5 பேருக்கு திடீா் உடல்நலக் குறைவு ஏற்பட்டது. இதைத் தொடா்ந்து, அந்தக் கடைக்கு உணவுப் பாதுகாப்புத் துறையினா் ‘சீல்’ வைத்தனா்.

புதுக்கோட்டை கீழ 4-ஆம் வீதியில், புதுக்குளம் பெரியாா் நகரைச் சோ்ந்த யூசுப் என்பவரது அசைவ உணவகத்தில் ஞாயிற்றுக்கிழமை இரவு, அப்துல்ஹக்கீம் (49), அவரது மனைவி சா்மிளா பானு (40), மகன்கள் அப்துல் ரகுமான் (7), முகமது அஸ்லாம் (15), மகள் சுமையா ரிஸ்வானா (18) ஆகிய 5 பேரும் சிக்கன்ரோல் சாப்பிட்டுள்ளனா்.

இதைத் தொடா்ந்து திங்கள்கிழமை அதிகாலை அவா்களுக்கு வயிற்றுப்போக்கு, வாந்தி ஏற்படவே, புதுக்கோட்டை அரசு மருத்துவக் கல்லூரி மருத்துவமனையில் அனுமதிக்கப்பட்டனா்.

இதுகுறித்து தகவலறிந்த மாவட்ட உணவுப் பாதுகாப்பு நியமன அலுவலா் பிரவீன்குமாா் தலைமையிலான உணவுப் பாதுகாப்புத் துறையினா், திங்கள்கிழமை முற்பகல் 11 மணியளவில் அந்தக் கடைக்குச் சென்றனா்.

கடையின் உரிமையாளா் யூசுப் முன்னிலையில் கடையின் குளிா்பதனப் பெட்டியைத் திறந்து பாா்த்தபோது, 7 கிலோ கெட்டுப்போன கோழிக்கறி வைக்கப்பட்டிருந்தது தெரியவந்தது. இதைத் தொடா்ந்து அவா்கள் அந்தக் கடைக்கு ‘சீல்’ வைத்தனா்.