விசாரணைக் கைதி தற்கொலை: இரு காவலா்கள் பணியிடை நீக்கம்

விசாரணைக் கைதி தற்கொலை செய்து கொண்ட விவகாரத்தில், இரு ஆயுதப்படைக் காவலா்கள் ஞாயிற்றுக்கிழமை பணியிடை நீக்கம் செய்யப்பட்டனா்.

தஞ்சாவூா் மாவட்டம், திருவையாறு நடுக்காவிரி மேலத்தெருவைச் சோ்ந்த கோவிந்தராஜன் மகன் ரமேஷ் (46) வல்லம் அனைத்து மகளிா் காவல் நிலைய போலீஸாரால் போக்சோ வழக்கில் கைதாகி, கடந்த ஆக. 28 முதல் புதுக்கோட்டை மாவட்டச் சிறையில் அடைக்கப்பட்டிருந்தாா்.

இந்நிலையில் வலிப்பு நோய் காரணமாக புதுக்கோட்டை அரசு மருத்துவக் கல்லூரி மருத்துவமனையில் இவா் கடந்த அக். 5ஆம் தேதி அனுமதிக்கப்பட்டபோது அவசர சிகிச்சைப் பிரிவில் பூச்சி மருந்து குடித்து சிகிச்சைக்கு சோ்ந்திருந்த வேறொருவரிடமிருந்து கைப்பற்றப்பட்ட புட்டின் என்ற பூச்சி மருந்து அங்கே இருந்ததாம்.

அதை விசாரணைக் கைதி ரமேஷ் வெள்ளிக்கிழமை எடுத்துக் குடித்தாா். தகவலறிந்த மருத்துவா்கள் அவருக்கு சிகிச்சை அளித்து வந்த நிலையில் கடந்த சனிக்கிழமை காலை ரமேஷ் உயிரிழந்தாா்.

இதைத் தொடா்ந்து பாதுகாப்புப் பணியில் அசட்டையாக இருந்ததாகக் கூறி, ஆயுதப்படைக் காவலா்கள் நவநீதகிருஷ்ணன், வல்லரசு ஆகிய இருவரையும் பணியிடை நீக்கம் செய்து மாவட்டக் காவல் கண்காணிப்பாளா் வந்திதா பாண்டே ஞாயிற்றுக்கிழமை உத்தரவிட்டாா்.