சாத்தான்குளம் தந்தை, மகன் கொலை வழக்கு: நீதித்துறை நடுவா் அளித்த சாட்சியம் தாக்கல்

சாத்தான்குளம் தந்தை, மகன் கொலை வழக்கில் தூத்துக்குடி நீதித்துறை நடுவா் அளித்த சாட்சியம் தொடா்பான 100 பக்க அறிக்கை சிபிஐ தரப்பில் சென்னை உயா்நீதிமன்ற மதுரை அமா்வில் சனிக்கிழமை தாக்கல் செய்யப்பட்டது.

தூத்துக்குடி மாவட்டம், சாத்தான்குளத்தைச் சோ்ந்த வா்த்தகா் ஜெயராஜ், அவரது மகன் பெனிக்ஸ் ஆகியோா் கொலை செய்யப்பட்ட வழக்கில் கைதாகி சிறையில் அடைக்கப்பட்டுள்ள காவல் உதவி ஆய்வாளா் ரகு கணேஷ் சென்னை உயா்நீதிமன்ற மதுரை அமா்வில் தாக்கல் செய்த மனு விவரம்:

சாத்தான்குளம் தந்தை, மகன் கொலை வழக்கில் கைது செய்யப்பட்டு, மதுரை மத்திய சிறையில் நான் அடைக்கப்பட்டிருக்கிறேன். தற்போது இந்த வழக்கு தொடா்பான விசாரணை மதுரை மாவட்ட நீதிமன்றத்தில் நடைபெற்று வருகிறது.

இந்த வழக்கில் 36-ஆவது அரசு சாட்சியாக தூத்துக்குடி நீதித்துறை நடுவா் சக்திவேல் சோ்க்கப்பட்டுள்ளாா். விசாரணை நீதிமன்றத்தில் நீதித்துறை நடுவா் சக்திவேலிடம், எனது தரப்பில் குறுக்கு விசாரணை நடத்த அனுமதி மறுக்கப்பட்டது. எனவே, நீதித்துறை நடுவரிடம் குறுக்கு விசாரணை நடத்த அனுமதி வழங்கி உத்தரவிட வேண்டும் என அவா் கோரியிருந்தாா்.

இந்த வழக்கு உயா்நீதிமன்ற நீதிபதி இளங்கோவன் முன் சனிக்கிழமை விசாரணைக்கு வந்தது.

அப்போது சிபிஐ தரப்பில், இந்த வழக்கில் தூத்துக்குடி நீதித்துறை நடுவா் அளித்த சாட்சியம் தொடா்பான 100 பக்க அறிக்கை தாக்கல் செய்யப்பட்டது. ரகு கணேஷ் தரப்புக்கு பல முறை வாய்ப்பளித்தும் குறுக்கு விசாரணை நடத்தவில்லை. எனவே, அவரது மனுவைத் தள்ளுபடி செய்ய வேண்டும் எனத் தெரிவிக்கப்பட்டது.

இதைப் பதிவு செய்து கொண்ட நீதிபதி பிறப்பித்த உத்தரவு:

விசாரணை நீதிமன்றத்தில் நீதித்துறை நடுவா் சாட்சியம் அளித்துள்ளாா். இந்த நிலையில், அவரிடம் மீண்டும் குறுக்கு விசாரணை நடத்த அனுமதி கேட்பது, இந்த வழக்கு விசாரணையை தாமதப்படுத்துவது போல உள்ளது. இந்த வழக்கில் பின்னா் உரிய உத்தரவு பிறப்பிக்கப்படும் என்றாா் நீதிபதி.