ராமேசுவரம் மீனவா்கள் 20 போ் விடுதலை: மூவருக்கு 6 மாதங்கள் சிறை- இலங்கை நீதிமன்றம் உத்தரவு

இலங்கை சிறையிலிருந்த ராமேசுவரம் மீனவா்கள் 20 பேரை விடுதலை செய்து ஊா்க்காவல்துறை நீதிமன்றம் செவ்வாய்க்கிழமை உத்தரவிட்டது. அதேநேரத்தில் 3 விசைப் படகு ஓட்டுநா்களுக்கு 6 மாதங்கள் சிறைத் தண்டனையும், தலா ரூ. 40 லட்சம் (இலங்கை பணம்) அபராதமும் விதிக்கப்பட்டது.

ராமநாதபுரம் மாவட்டம், ராமேசுவரத்திலிருந்து கடந்த மாதம் 9-ஆம் தேதி 350 விசைப் படகுகளில் 2,500-க்கும் மேற்பட்ட மீனவா்கள் மீன் வளம், மீனவா் நலத் துறை அனுமதி பெற்று கடலுக்குள் மீன்பிடிக்கச் சென்றனா்.

இவா்கள் அன்று நள்ளிரவு கச்சத்தீவு- நெடுந்தீவுக்கு இடையே மீன்பிடித்துக் கொண்டிருந்தனா். அப்போது, அங்கு 5 ரோந்துப் படகுகளில் வந்த இலங்கைக் கடற்படையினா் கீதன், சகாயராஜ், ராஜா ஆகியோருக்குச் சொந்தமான மூன்று விசைப் படகுகளை பறிமுதல் செய்தனா். மேலும், இந்தப் படகுகளிலிருந்த மாா்சல் (41), தயாளன் (45), தாமஸ் ஆரோக்கியம் (45), ஜான்பிரிட்டோ (58), ஜெயராஜ் (37), சண்முகவேல் (54), அருள் (40), கிங்ஸ்லி (40), ஜெரோம் (47), மரியரொனால்ட் (44), சரவணன் (43), யாக்கோபு (35), டைட்டஸ் (39), ரெக்ஸ்டென்னிஸ் (39), ஆனந்த் (38), அமலதீபன் (30), சுவிட்டா் (51), கிறிஸ்துராஜா (45), விஜி (43), ஜான் (27), லிங்கம் (50), சா்மிஸ் (32), சுல்டாஷ் (41) ஆகிய 23 மீனவா்களையும் கைது செய்து, இலங்கை காங்கேசன்துறை கடற்படை முகாமுக்கு அழைத்துச் சென்றனா்.

இதையடுத்து, மீனவா்கள் மீது எல்லை தாண்டி மீன்பிடித்ததாக வழக்குப் பதிந்து ஊா்க்காவல்துறை நீதிமன்றத்தில் முன்னிலைப்படுத்தி யாழ்ப்பாணம் சிறையில் அடைத்தனா்.

இந்த நிலையில், சிறையில் அடைக்கப்பட்டிருந்த 23 மீனவா்களும் செவ்வாய்க்கிழமை மீண்டும் ஊா்க்காவல்துறை நீதிமன்றத்தில் முன்னிலைப்படுத்தப்பட்டனா். இவா்களிடம் விசாரணை மேற்கொண்ட நீதிபதி, 20 மீனவா்களை இனிமேல் எல்லை தாண்டி மீன்பிடிக்க வரக் கூடாது என எச்சரித்து விடுதலை செய்தாா். அதேநேரத்தில், மூன்று விசைப் படகு ஓட்டுநா்களுக்கு தலா 6 மாதங்கள் சிறைத் தண்டணையும், தலா ரூ. 40 லட்சம் (இலங்கை பணம்) அபராதமும், இந்த அபராதத் தொகையை கட்டத் தவறினால் மேலும் மூன்று மாதங்கள் சிறைத் தண்டனை அனுவிக்க வேண்டும் என நீதிபதி உத்தரவிட்டாா்.

இதைத்தொடா்ந்து, விடுதலை செய்யப்பட்ட ராமேசுவரம் மீனவா்கள் 20 பேரும் இந்தியத் தூதரக அதிகாரிகளிடம் ஒப்படைக்கப்பட்டனா். இவா்கள் இன்னும் ஓரிரு நாள்களில் நாடு திரும்புவாா்கள் என இந்தியத் தூதரக அதிகாரிகள் தெரிவித்தனா்.