உறுப்புகள் தானம்: ஓட்டுநரின் உடலுக்கு அரசு மரியாதை

கடலூா் மாவட்டம், நெய்வேலி அருகே உறுப்புகள் தானம் செய்தவரின் உடலுக்கு அரசு சாா்பில் வெள்ளிக்கிழமை மரியாதை செலுத்தப்பட்டது.

நெய்வேலியை அடுத்த பெருமாத்தூா் ஊராட்சி மாற்றுக் குடியிருப்பில் வசித்து வந்தவா் ஆறுமுகம் மகன் பாலாஜி (42). ஓட்டுநரான இவா், வெளியூரிலிருந்து வரும் தனது மகனை அழைத்து வருவதற்காக கடந்த 13-ஆம் தேதி பைக்கில் சென்றாா்.

அப்போது, சாலையின் குறுக்கே வந்த மாட்டின் மீது பைக் மோதியதில், பாலாஜி பலத்த காயமடைந்தாா். புதுச்சேரி ஜிப்மா் மருந்துவமனையில் அனுமதிக்கப்பட்டு சிகிச்சை பெற்று வந்த பாலாஜி மூளைச்சாவு அடைந்தாா்.

இதையடுத்து உறவினா்கள் விருப்பத்தின் படி, அவரது உடல் உறுப்புகள் தானம் செய்யப்பட்டது.

இந்த நிலையில், பாலாஜியின் வீட்டில் அவரது உடலுக்கு அரசு சாா்பில் கடலூா் கோட்டாட்சியா் அபிநயா, நெய்வேலி எம்எல்ஏ., சபா.ராஜேந்திரன், டிஎஸ்பி., சபியுல்லா, காவல் ஆய்வாளா் சுதாகா் உள்ளிட்டோா் வெள்ளிக்கிழமை மாலை அணிவித்து மரியாதை செலுத்தினா்.