முழுக் கொள்ளளவை எட்டியது வீராணம் ஏரி!

கடலூா் மாவட்டம், காட்டுமன்னாா்கோவிலில் உள்ள வீராணம் ஏரி 3-ஆவது முறையாக முழு கொள்ளளவை எட்டியது. இதனை வேளாண், உழவா் நலத்துறை அமைச்சா் எம்.ஆா்.கே. பன்னீா்செல்வம் சனிக்கிழமை ஆய்வு மேற்கொண்டாா்.

காட்டுமன்னாா்கோவிலில் உள்ள வீராணம் ஏரிக்கு கீழணையில் இருந்து வடவாறு வழியாக தண்ணீா் வருகிறது. இந்த ஏரி மூலம் 44 ஆயிரத்து 856 ஏக்கா் விளைநிலங்கள் பாசன வசதி பெறுகின்றன. சென்னைக்கு குடிநீரும் அனுப்பப்படுகிறது.

தற்போது, வடகிழக்கு பருவமழை தொடங்கிய நிலையில், வீராணம் ஏரி 3-ஆவது முறையாக முழுக் கொள்ளளவை (47.50 அடி) எட்டியுள்ளது. அதாவது 1,465 மில்லியன் கன அடி நீா் உள்ளது.

எனவே, ஏரியின் பாதுகாப்பு கருதி சேத்தியாத்தோப்பு அணைக்கட்டு வாயிலாக வினாடிக்கு 300 கன அடி வீதம் தண்ணீா் திறந்து விடப்படுகிறது.

சனிக்கிழமை நிலவரப்படி வீராணம் ஏரியிலிருந்து, சென்னைக்கு வினாடிக்கு 65 கன அடியும், பாசனத்துக்கு 150 கன அடியும் தண்ணீா் திறந்து விடப்படப்படுகிறது. கீழணையிலிருந்து, வீராணம் ஏரிக்கு தண்ணீா் திறப்பு நிறுத்தி வைக்கப்பட்டுள்ளது.