புகையிலைப் பொருள்கள் பறிமுதல்: இருவா் கைது

கடலூா் மாவட்டம், வேப்பூா் அருகே மளிகைக் கடையில் பதுக்கி வைக்கப்பட்டிருந்த புகையிலைப் பொருள்களை போலீஸாா் சனிக்கிழமை பறிமுதல் செய்தனா். இதில், இருவா் கைது செய்யப்பட்டனா்.

கடலூா் மாவட்டத்தின் பல்வேறு பகுதிகளில் போலீஸாா் சோதனை நடத்தி புகையிலைப் பொருள்களை பறிமுதல் செய்து வருகின்றனா்.

அதன்படி, சிறப்பு காவல் உதவி ஆய்வாளா்கள் மில்டன், செல்வகுமாா் மற்றும் உதவி ஆய்வாளா் அழகிரி ஆகியோா் தலைமையிலான இரண்டு தனிப்படையினா் வேப்பூா் வட்டம், பெரிய நெசலூா் பகுதியில் சோதனை மேற்கொண்டனா்.

அப்போது, தங்கராசு மகன் இளங்கோவன் (38) மளிகைக் கடையில் இருந்து 20 கிலோ புகையிலைப் பொருள்களையும், இதே பகுதியைச் சோ்ந்த மற்றொரு தங்கராசு மகன் செல்வம் (48) மளிகைக் கடையில் இருந்து 2 கிலோ புகையிலைப் பொருள்களையும் போலீஸாா் பறிமுதல் செய்தனா். இதன் மதிப்பு ரூ.48 ஆயிரம் ஆகும்.

இதையடுத்து தனிப்படை போலீஸாா் பறிமுதல் செய்த 22 கிலோ புகையிலைப் பொருள்கள் மற்றும் பிடிபட்டவா்களை வேப்பூா் காவல் நிலையத்தில் ஒப்படைத்தனா். இதுகுறித்து, வேப்பூா் போலீஸாா் வழக்குப் பதிந்து செல்வம், இளங்கோவன் ஆகியோரை சிறையில் அடைத்தனா்.