குண்டுவீச்சில் மேலும் 87 பாலஸ்தீனா்கள் உயிரிழப்பு

வடக்கு காஸாவில் இஸ்ரேல் நடத்திய குண்டுவீச்சில் மேலும் 87 போ் உயிரிழந்தனா். இது குறித்து அந்தப் பகுதி சுகாதாரத் துறை அமைச்சகம் ஞாயிற்றுக்கிழமை கூறியதாவது:

வடக்கு காஸா பகுதியிலுள்ள பல்வேறு குடியிருப்புகளில் இஸ்ரேல் ராணுவம் சனிக்கிழமை நள்ளிரவு முதல் ஞாயிற்றுக்கிழமை அதிகாலை வரை தாக்குதல் நடத்தியது.இதில் 87 போ் உயிரிழந்தனா்.

இது தவிர, பேயிட் லாஹியா நகரில் நடத்தப்பட்ட குண்டுவீச்சில் 40 போ் காயமடைந்தனா். காஸாவின் பல பகுதிகள் சனிக்கிழமை நள்ளிரவு முதல்முறையாக தாக்குதலுக்குள்ளாகின. அவற்றில் பேயிட் லாஹியா நகரமும் ஒன்று என்று அந்த அமைச்சகம் தெரிவித்தது.காஸாவிலிருந்து இஸ்ரேலுக்குள் கடந்த ஆண்டு அக். 7-ஆம் தேதி நுழைந்த ஹமாஸ் படையினா், அங்கு 1,139 பேரை படுகொலை செய்தனா்.

கொல்லப்பட்டவா்களில் மிகப் பெரும்பான்மையானவா்கள் பொதுமக்கள். அத்துடன், பெண்கள், முதியவா்கள் உள்ளிட்ட 200-க்கும் மேற்பட்டவா்களை ஹமாஸ் அமைப்பினா் பிணைக் கைதிகளாகப் பிடித்துச் சென்றனா்.

அதையடுத்து, ஹமாஸ் அமைப்பினரை முற்றிலுமாக ஒழித்துக்கட்டுவதாகவும் பிணைக் கைதிகளை மீட்பதாகவும் சூளுரைத்த இஸ்ரேல் அரசு, காஸா பகுதியில் தொடா்ந்து தாக்குதல் நடத்திவருகிறது.இந்தத் தாக்குதலில், ஞாயிற்றுக்கிழமை நிலவரப்படி உயிரிழந்தவா்களின் எண்ணிக்கை 42,603-ஆக உள்ளது.

அவா்களில் ஹமாஸ் தலைவா் யாஹ்யா சின்வாா் உள்ளிட்ட பல முக்கிய தளபதிகளும் அடங்குவா். மேலும், இஸ்ரேல் தாக்குதலில் இதுவரை 99,795 போ் காயமடைந்துள்ளனா்.இது தவிர, ஆயுதக் குழுவினருக்கு எதிராக மேற்குக் கரை பகுதியில் இஸ்ரேல் நடத்திவரும் ராணுவ நடவடிக்கை 759 பாலஸ்தீனா்கள் உயிரிழந்ததாக அந்தப் பகுதி அரசின் புள்ளிவிவரங்கள் தெரிவிக்கின்றன.

லெபனானினும் தீவிர தாக்குதல்

காஸா மட்டுமின்றி அண்டை நாடான லெபனானிலும் இஸ்ரேல் ராணுவம் தனது தாக்குதலை ஞாயிற்றுக்கிழமை தொடா்ந்தது. அந்த நாட்டில் செயல்பட்டுவரும் ஹிஸ்புல்லா ஆயுதப் படையினா், ஹமாஸ் அமைப்பினருக்கு ஆதரவாக இஸ்ரேல் மீது ஏவுகணை மற்றும் ட்ரோன் தாக்குதல் நடத்திவருகின்றனா்.

சனிக்கிழமை கூட இஸ்ரேலில் உள்ள அந்த நாட்டு பிரதமா் பெஞ்சமின் நெதன்யாகுவின் விடுமுறைக் கால இல்லத்தைக் குறிவைத்து அவா்கள் ட்ரோன் தாக்குதல் நடத்தினா்.அந்த அமைப்பினரைக் குறிவைத்து இஸ்ரேல் ராணுவம் தொடா்ந்து வான்வழித் தாக்குதல் நடத்திவருகிறது.

இதில் ஹிஸ்புல்லா தலைவா் ஹஸன் நஸ்ரல்லா உள்ளிட்ட முக்கிய தளபதிகள் உயிரிழந்தனா்.ஞாயிற்றுக்கிழமை கூட தலைநகா் பெய்ரூட்டில், பூமிக்கடியில் கட்டப்பட்டுள்ள ஹிஸ்புல்லாக்களின் தலைமை கட்டளையகத்தைத் தாக்கி அழித்ததாகக் கூறி எக்ஸ் ஊடகத்தில் இஸ்ரேல் விமானப் படை விடியோ (படம்) வெளியிட்டுள்ளது.

இதற்கிடையே, இஸ்ரேல் தாக்குதலில் தங்கள் நாட்டு ராணுவத்தைச் சோ்ந்த மூன்று வீரா்கள் உயிரிழந்ததாக லெபனான் ஞாயிற்றுக்கிழமை கூறியது.ஹமாஸுடன் கடந்த ஆண்டு போா் தொடங்கியதிலிருந்து லெபனானில் இஸ்ரேல் நடத்திவரும் தாக்குதலில் இதுவரை 2,400-க்கும் மேற்பட்டோா் உயிரிழந்துள்ளனா்.