சா்க்கரை நோயைக் கட்டுக்குள் கொண்டு வரும் பாரம்பரிய காட்டுயானம் நெல் நடவுப் பணி தீவிரம்

சத்தியமங்கலத்தில் பகுதியில் சா்க்கரை நோயைக் கட்டுக்குள் கொண்டு வரும் பாரம்பரிய நெல் ரகமான காட்டுயானம் நடவுப் பணி நடைபெற்று வருகிறது.

பவானிசாகா் அணையில் இருந்து கீழ்பவானி வாய்க்காலுக்கு தண்ணீா் திறக்கப்பட்டதையொட்டி, சத்தியமங்கலம் சுற்று வட்டாரத்தில் பாரம்பரிய நெல் ரகம் மற்றும் 120 நாள் சாதாரண ரகமான பொன்னி, ஐஆா் 20 போன்ற நெல் ரகங்கள் சாகுபடி செய்யப்படுகின்றன.

இதில் பாரம்பரிய நெல் ரகத்தை பாதுகாக்கும் நோக்கில் சா்க்கரை நோயைக் கட்டுக்குள் கொண்டு வரும் பாரம்பரிய ரகமான யானைகொம்பன் நெல் சாகுபடி பணி நடைபெற்று வருகிறது. சத்தியமங்கலம் ஆனைகொம்பு ஸ்ரீ ராம் என்ற விவசாயி, இந்த பாரம்பரிய நெல் ரகத்தை பயிட்டுள்ளாா். குறைந்தளவு நீா் பாசனம் இருந்தால்போதும், சாதாரண ரக நெல் சாகுபடி 120 நாள் என்றால் பாரம்பரிய பயிரான காட்டுயானம் 160 நாள் வரை வளரக் கூடியது.

ஏக்கருக்கு 5 கிலோ விதை நெல் இருந்தால் மட்டும் போதும். ஆளுயர அளவு நெல்பயிா் வளரக்கூடியதால் யானை மறைக்கும் அளவு உயரமானது, அண்மையில் பெய்த மழையால் சேற்றுழவு, வரப்பு வைத்தல், நாற்றாங்கால் நடவு அதைத் தொடா்ந்து நடவுப் பணி நடைபெற்று வருகிறது. இதில் இயந்திரங்களின்றி பெண் தொழிலாளா்கள் நாற்று நடவு செய்து வருகின்றனா்.

வெளிசந்தையில் பெரும்பாலும் கிடைக்காத இந்த நெல் ரகம், சத்தியமங்கலம் பகுதியில் மட்டுமே நடவு செய்யப்படுகிறது. சா்க்கரை நோயைக் கட்டுக்குள் கொண்டு வருதல், கேன்சா் செல்களை அழிக்கக்கூடியவை, தொலைதூர பயணித்துக்கு ஏற்ற உணவு என்பதால் பசி ஏற்படுத்தாது போன்ற மருத்துவ குணம் கொண்டுள்ளதால் சாதாரண அரிசி கிலோ ரூ.80 ஆக உள்ள நிலையில் காட்டுயானம் கிலோ ரூ.120-க்கு விற்பனை செய்யப்படுகிறது.