அண்ணாமலைப் பல்கலை. ஆசிரியா்களை அரசுக் கல்லூரிகளில் பணி நிரந்தரம் செய்யக்கூடாது: தமிழ்நாடு அரசுக் கல்லூரி ஆசிரியா் கழகம்

அரசுக் கல்லூரிகளில் மாற்றுப் பணி அடிப்படையில் பணியமா்த்தப்பட்ட அண்ணாமலைப் பல்கலைக்கழக ஆசிரியா்களை அரசுக் கல்லூரிகளில் பணி நிரந்தரம் செய்யக் கூடாது என தமிழ்நாடு அரசுக் கல்லூரி ஆசிரியா்கள் கழகம் கோரிக்கை விடுத்துள்ளது.

இதுகுறித்து அரசுக் கல்லூரி ஆசிரியா்கள் கழக மாநிலத் தலைவா் பி.டேவிட் லிவிங்ஸ்டன், பொதுச் செயலா் சோ.சுரேஷ் ஆகியோா் கூட்டாக வெளியிட்ட அறிக்கை:

2000-ஆம் ஆண்டுக்குப் பிறகு முறையான பணியமா்த்துதல் நடவடிக்கைகளை மேற்கொள்ளாமலும், இட ஒதுக்கீட்டை பின்பற்றாமலும் அனுமதிக்கப்பட்ட பணியிடங்களுக்கும் கூடுதலாக பணியமா்த்தப்பட்ட ஆசிரியா்கள், உபரியாக இருப்பதாகத் தெரிவித்து 2016-ஆம் ஆண்டு முதல் மூன்று ஆண்டு மாற்றுப் பணி அடிப்படையில் அரசுக் கல்லூரிகளில் நியமிக்கப்பட்டனா்.

இவ்வாறு மாற்றுப் பணியில் அரசுக் கல்லூரிகளில் பணியம்த்தப்பட்ட ஆசிரியா்களின் எண்ணிக்கை ஆயிரத்துக்கும் அதிகமாக உள்ளது. மாற்றுப்பணி மீண்டும், மீண்டும் புதுப்பிக்கப்படுகிறது. சமூக நீதி அடிப்படையில் முறையான இட ஒதுக்கீட்டை பின்பற்றி, ஆசிரியா் தோ்வு வாரியம் மூலமாக கிடைக்க வேண்டிய பணி நியமனம் இதனால் தடுக்கப்படுகிறது.

எனவே, அண்ணாமலைப் பல்கலைக்கழகத்தில் பணியாற்றும் ஆசிரியா்கள் பணி ஓய்வுபெறும்போது, உபரி ஆசிரியா்களை திரும்ப அழைத்துக்கொள்ள வேண்டும். தமிழகத்தில் இயங்கி வரும் அரசு பல்கலைக்கழகங்களில் உள்ள காலிப்பணியிடங்களில் அண்ணாமலைப் பல்கலைக்கழக உபரி ஆசிரியா்களை நியமிக்க வேண்டும்.

1981-ஆம் ஆண்டுக்கு முன்பு அண்ணாமலைப் பல்கலைக்கழகத்தில் இளநிலை பாடப்பிரிவுகள் இயங்கி வந்தன. எனவே, தற்போதும் அங்கு இளநிலை பாடப்பிரிவுகளை தொடங்கி அண்ணாமலைப் பல்கலைக்கழக உபரி ஆசிரியா்களை, அவா்களின் பல்கலைக்கழகத்திலியே பணியமா்த்தலாம்.

மேற்கூறிய மாற்று வழிகளை பரிசீலனை செய்து, அரசுக் கல்லூரிகளில் பணியாற்றும் அண்ணாமலைப் பல்கலைக்கழக ஆசிரியா்களின் மாற்றுப் பணியை ரத்து செய்ய ஆவன செய்யுமாறு தமிழக முதல்வா், உயா் கல்வித் துறை அமைச்சா் ஆகியோரை கேட்டுக்கொள்கிறோம் எனத் தெரிவித்துள்ளனா்.