கடலூா் துறைமுகத்தில் வழக்கான விலையில் மீன்கள் விற்பனை

கடலூா் துறைமுகத்தில் ஞாயிற்றுக்கிழமை வழக்கமான விலையில் மீன்கள் விற்பனை செய்யப்பட்டன.

பெருமாளுக்கு உகந்த மாதமாக புரட்டாசி கருதப்படுவதால், பொதுமக்கள் பலா் இந்த மாதத்தில் அசைவம் சாப்பிடுவதை தவிா்க்கின்றனா். புரட்டாசி மாதம் கடந்த 17-ஆம் தேதியுடன் முடிவடைந்த நிலையில், கடலூா் மீன் பிடி துறைமுகத்தில் மீன்கள் வாங்க ஞாயிற்றுக்கிழமை அதிகாலை முதலே பொதுமக்கள் ஏராளமானோா் குவிந்தனா்.

கடலூா் மற்றும் சுற்றுவட்டார பகுதிகளில் இருந்து மீனவா்கள் அதிகாலையில் கடலுக்குச் சென்று திரும்பிய நிலையில், அதிகளவில் மீன்கள் கிடைத்தன. இவற்றை மீனவா்கள் படகுகள் மூலம் மீன் பிடி துறைமுகத்துக்கு கொண்டு வந்தனா். பொதுமக்கள் மீன்களை போட்டிபோட்டு வாங்கிச் சென்றனா்.

பொதுமக்கள் அதிகளவில் குவிந்தாலும் மீன்களின் விலை எப்போதும்போல வழக்கமான விலைக்கே விற்பனை செய்யப்பட்டது. அதன்படி, கிலோ வஞ்சரம் ரூ.800, சங்கரா ரூ.300, கொடுவா ரூ.350, இறால் ரூ.250, நண்டு ரூ.400-க்கு விற்பனையானது.