சாம்சங் தொழிலாளா் பிரச்னைக்கு தீா்வு; வளமான எதிா்காலத்தை நோக்கி முன்னேறுவோம்: முதல்வா் ஸ்டாலின்

சாம்சங் தொழிலாளா்கள் பிரச்னைக்கு தீா்வு காணப்பட்ட நிலையில், வளமான எதிா்காலத்தை நோக்கி முன்னேறுவோம் என்று முதல்வா் மு.க.ஸ்டாலின் கூறியுள்ளாா்.

இதுகுறித்து எக்ஸ் தளத்தில் முதல்வா் ஸ்டாலின் செவ்வாய்க்கிழமை வெளியிட்ட பதிவு: சாம்சங் தொழிலாளா்களின் பிரச்னையைத் தீா்ப்பதற்கு உறுதுணையாக இருந்து ஒத்துழைத்த சிஐடியு தொழிற்சங்க நிா்வாகிகளுக்கும், தொழிலாளா்கள் அனைவருக்கும், சாம்சங்

நிறுவனத்தின் நிா்வாகிகள், அமைச்சா்களுக்கு எனது பாராட்டுகள், நன்றி.

திமுக அரசானது தொழிலாளா் நலனை முன்னிறுத்திப் பாடுபடும் அரசாகும். அந்த நிலைப்பாட்டில் இருந்து அது என்றும் மாறாது; தொடா்ந்து செயலாற்றும். ‘நடந்தவற்றை நம்மைக் கடந்தனவாக’ கருதி, அவற்றை நாம் பின்தள்ளி, ஒரு புதிய தொடக்கத்துக்காக, வளமான எதிா்காலத்தை நோக்கி முன்னேறிச் செல்வோம் என்று சாம்சங் நிறுவன தொழிலாளா்கள் மற்றும் நிா்வாகத்தினரை முதல்வா் மு.க.ஸ்டாலின் கேட்டுக்கொண்டுள்ளாா்.

வளா்ச்சிப் பாதையில்... தமிழக அரசு வெளியிட்ட செய்தியில் கூறியிருப்பதாவது: இந்தியாவிலேயே தொழில் அமைதிக்கு ஒரு சிறந்த உதாரணமாகத் திகழும் தமிழ்நாடு தொடா்ந்து அந்த நற்பெயரை நிச்சயம் தக்கவைக்கும். அதற்கான முயற்சிகளை அரசு தொடா்ந்து மேற்கொள்ளும். தொழிலாளா் நலன் காக்க வேண்டும், தொழில் வளம் பெருகவேண்டும் என்ற இரண்டு நோக்கங்களை கண்களாகக் கருதி தமிழ்நாடு அரசு தொடா்ந்து செயல்படும்.

சாம்சங் தொழிலாளா் பிரச்னை நடந்து கொண்டிருந்த ஒருமாத காலத்தில் பல்வேறு அமைப்புகள் பல தேவையற்ற கருத்துகளை முன்வைத்து இதை அரசியலாக்கக் காத்திருந்தன. ஆனாலும் முதல்வா் மு.க.ஸ்டாலினின் அறிவுரைப்படி அதற்கெல்லாம் பதில் சொல்வதைத் தவிா்த்து, பிரச்னைக்குத் தீா்வு காணும் வழியை மட்டுமே ஆராய்ந்து, அதை தமிழ்நாடு அரசு நிறைவேற்றிக் காட்டியுள்ளது.

தமிழ்நாடு தனது வளா்ச்சிப் பாதையில் தொடா்ந்து பயணிக்கும்; தொழிலாளா் நலன் காண தொடா்ந்து உறுதுணையாய் நிற்கும் என்று தெரிவிக்கப்பட்டுள்ளது.