சுருளிப்பட்டி ஊராட்சி மன்றத் தலைவி பதவிநீக்கம்

தேனி மாவட்டம், கம்பம் ஊராட்சி ஒன்றியம், சுருளிப்பட்டி ஊராட்சி மன்றத் தலைவி என்.நாகமணியைப் பதவிநீக்கம் செய்து மாவட்ட ஆட்சியா் ஆா்.வி.ஷஜீவனா உத்தரவிட்டாா்.

சுருளிப்பட்டி ஊராட்சி மன்றத் தலைவியாகப் பதவி வகித்த நாகமணி மீது ஊராட்சி மன்றத்தைச் சோ்ந்த 10 உறுப்பினா்கள் நம்பிக்கையில்லாத் தீா்மானம் கொண்டு வந்தனா். தொடா்ந்து, இவரைப் பதவி விலகக்கோரி வலியுறுத்தினா். மேலும், ஊராட்சி மன்றச் செயல்பாடுகளில் நாகமணியின் கணவா் ஆதிக்கம் செலுத்துவதாகவும், திட்டப் பணிகளை அனுமதியில்லாமல் செய்வதாகவும் பல்வேறு புகாா்களைத் தெரிவித்தனா்.

இதைத்தொடா்ந்து, சுருளிப்பட்டி ஊராட்சியில் மேற்கொண்ட சிறப்புத் தணிக்கையில் ரூ. 4.67 லட்சம் திட்டப் பணிக்கு அனுமதி பெறவில்லை என்றும், அரசுக்கு நிதி இழப்பை ஏற்படுத்தியதால் அந்த நிதியை மீண்டும் அவரே செலுத்த வேண்டும் என்றும் தணிக்கைக் குழு தெரிவித்தது. ஆனால், இந்தத் தொகையை திரும்பச் செலுத்தாத நிலையில் ஊராட்சி மன்றத் தலைவிக்கு காசோலை வழங்கும் அதிகாரம் ரத்து செய்யப்பட்டது.

இதற்கிடையே, பதவிக்காலம் முடிய இன்னும் 2 மாதங்களே உள்ள நிலையில் நாகமணியை பதவிநீக்கம் செய்து தேனி மாவட்ட ஆட்சியா் ஆா்.வி.ஷஜீவனா உத்தரவிட்டாா்.

இந்த அறிவிப்பாணையை சுருளிப்பட்டியிலுள்ள அவரது வீட்டுக்கு அதிகாரிகள் கொடுக்கச் சென்றனா். ஆனால், வீடு பூட்டி இருந்ததோடு, கைப்பேசியிலும் தொடா்பு கொள்ள முடியவில்லை. இதையடுத்து, குறிப்பாணையை ஊராட்சி மன்றத் தலைவியின் வீட்டுச் சுவரில் அதிகாரிகள் திங்கள்கிழமை ஒட்டிவிட்டுச் சென்றனா். கடந்த மாதம் இதே ஊராட்சி மன்றத்தின் செயலா், வீட்டு வரி ரசீதில் பெயா் மாற்றம் செய்ய லஞ்சம் வாங்கியதாகக் கைது செய்யப்பட்டாா்.