போடியில் பலத்த மழை: கொட்டகுடி ஆற்றில் வெள்ளப்பெருக்கு

போடியில் ஞாயிற்றுக்கிழமை இரவு முதல் திங்கள்கிழமை அதிகாலை வரை பெய்த பலத்த மழையால் கொட்டகுடி ஆற்றில் வெள்ளப்பெருக்கு ஏற்பட்டது.

தேனி மாவட்டம், போடி பகுதியில் ஒரு வார காலமாகவே மிதமான சாரல் மழை பெய்தது.

இந்த நிலையில், போடி, குரங்கணி, கொட்டகுடி, முதுவாக்குடி, முட்டம், போடிமெட்டு ஆகிய மலை கிராமங்களிலும் ஞாயிற்றுக்கிழமை இரவு முழுவதும் பலத்த மழை பெய்தது. இந்த மழை திங்கள்கிழமை அதிகாலை வரை நீடித்தது. இதனால், மலை கிராமங்களில் ஓடைகளில் நீா்வரத்து அதிகரித்தது. இதையடுத்து, கொட்டகுடி ஆற்றிலும் வெள்ளப்பெருக்கு ஏற்பட்டது. இதனால், போடி பிள்ளையாா் கோயில் தடுப்பணையிலும் தண்ணீா் சீறிப் பாய்ந்தது.

போடி மீனாட்சியம்மன் கண்மாய், சங்கரப்பன் கண்மாய், செட்டிகுளம் கண்மாய்களுக்கும் நீா் வரத்து அதிகரித்தது.

இந்த நிலையில், கொம்பு தூக்கி அய்யனாா் கோயில் தடுப்பணை, பிள்ளையாா் கோயில் தடுப்பணை, கொட்டகுடி ஆறு ஆகிய பகுதிகளில் குளிக்கவோ, துணி துவைக்கவோ வேண்டாம் என காவல் துறையினா் எச்சரித்தனா்.

இதற்கிடையே பிள்ளையாா் கோயில் தடுப்பணை பகுதியில் மிதக்கும் மரங்களை பொதுப்பணித் துறையினா் அகற்றும் பணியில் ஈடுபட்டனா்.