சேலம் மாவட்டத்தில் 45 இடங்களில் வெள்ள அபாய எச்சரிக்கை கருவிகள் பொருத்த நடவடிக்கை

சேலம் மாவட்டத்தில் வெள்ளம் வருவதை முன்கூட்டியே தெரிவிக்கும் எச்சரிக்கை கருவி 45 இடங்களில் பொருத்த அதிகாரிகள் நடவடிக்கை மேற்கொண்டுள்ளனா்.

தமிழகம் முழுவதும் வடகிழக்குப் பருவமழை தீவிரமாக பெய்து வருகிறது. சேலம் மாவட்டத்திலும் கடந்த சில நாள்களாக இரவு நேரத்தில் கனமழை கொட்டி தீா்த்தது. டிசம்பா் மாதம் வரை வடகிழக்குப் பருவமழை தீவிரமாக பெய்யும் என கணிக்கப்பட்டுள்ளதால், குறிப்பாக வட மாவட்டங்களான சேலம், நாமக்கல், திருப்பூா், ஈரோடு, கோவையில் அதிக கனமழை பெய்ய வாய்ப்புள்ளதாக வானிலை ஆய்வு மையம் எச்சரித்துள்ளது. இதனால், வட மாவட்டங்களில் பருவமழை முன்னெச்சரிக்கை பணியை அரசு முடுக்கிவிட்டுள்ளது.

ஒவ்வொரு மாவட்டத்திலும் எங்கெல்லாம் வெள்ளம் ஏற்பட வாய்ப்புள்ளது?, அதிக நீா்த்தேங்க வாய்ப்புள்ள பகுதிகள் எவை? எனக் கணக்கிட்டு, அங்கு முன்னெச்சரிக்கை பணியை அதிகாரிகள் செய்து வருகின்றனா். அந்த வகையில், சேலம் மாவட்டத்தில் சேலம் மாநகா், ஏற்காடு, வாழப்பாடி, ஆத்தூா், வீரபாண்டி, எடப்பாடி, சங்ககிரி, மேட்டூா், ஓமலூா் பகுதிகளில் மழை பொழிவால் அதிகம் பாதிப்பு ஏற்பட வாய்ப்புள்ள இடங்களாக 45 இடங்களைக் கண்டறிந்துள்ளனா்.

அந்த 45 இடங்களிலும் வெள்ளம் வருவதை முன்கூட்டியே தெரிவிக்கும் எச்சரிக்கை கருவிகள் பொருத்த மாவட்ட நிா்வாகம் முடிவு செய்துள்ளது.

இதுகுறித்து வருவாய், பேரிடா் மேலாண்மைத் துறை அதிகாரிகள் கூறியதாவது:

இந்த முன்கூட்டியே எச்சரிக்கை செய்யும் கருவி, சென்சாா் மற்றும் தகவல் தொடா்பு அமைப்புகளின் வலையமைப்பாகும். இந்தக் கருவி, வெள்ளம் உள்ளிட்ட ஆபத்துகளை முன்கூட்டியே அறிந்து மக்களைக் காப்பாற்ற உதவிடும்.

இந்தப் பேரிடா் காக்கும் எச்சரிக்கை கருவியின் மூலம் வெள்ள அபாயம் உள்ளிட்ட ஆபத்துகளை அறிந்ததும், மக்களை அந்த இடங்களில் இருந்து வெளியேற்றவும், உடைமைகளை பாதுகாக்கவும் முடியும். இதன்மூலம் குறைந்தது 30 சதவீத அளவில் சேதத்தைத் தடுக்க இயலும்.

சேலம் மாவட்டத்தில் அதிகனமழையால் பாதிப்பு ஏற்படும் எனக் கணிக்கப்பட்டுள்ள 45 இடங்களிலும் இந்தக் கருவியைப் பொருத்தி விட்டால், குறைந்தது 24 மணி நேரத்துக்கும் முன்பே மக்களை உஷாா்படுத்தி பாதுகாக்க இயலும். அதற்காகதான், இந்தக் கருவியை விரைந்து 45 இடங்களிலும் பொருத்திட நடவடிக்கை எடுக்கப்பட்டு வருவதாகத் தெரிவித்தனா்.