ஊக்கத்தொகை தந்த முதல்வருக்கு நன்றி: மாரியப்பன், துளசிமதி நெகிழ்ச்சி

சேலத்தில் நடைபெற்ற விளையாட்டு உபகரணங்கள் வழங்கும் விழாவில், பாரா ஒலிம்பிக்கில் பதக்கம் வென்ற மாரியப்பன், துளசிமதி ஆகியோருக்கு துணை முதல்வா் உதயநிதி ஸ்டாலின் கேடயம் வழங்கி கௌரவித்தாா்.

விழாவில் வீரா் மாரியப்பன் பேசுகையில், முன்பெல்லாம் இதுபோன்ற வசதிகள் கிடையாது. இப்போது நிறைய வசதிகள் உள்ளன. 2006 ஆம் ஆண்டு முதல் முறையாக பதக்கம் வென்றபோது, எனக்கு போதிய ஆதரவு அளிக்கவில்லை. தற்போது உதயநிதி ஸ்டாலின் விளையாட்டு வீரா்களுக்கு பெரிதும் உறுதுணையாக உள்ளாா். வெற்றி பெற்று தாயகம் திரும்பயதும், உடனடியாக ஊக்கத்தொகை வழங்கினாா். இதுபோன்று எந்த மாநிலத்திலும் இல்லை. விளையாட்டு வீரா்களுக்கு முன்பெல்லாம் உபகரணங்கள் எதுவும் வழங்கமாட்டாா்கள். தற்போது அரசே வழங்குவது வரவேற்கத்தக்கது என்றாா்.

பாட்மிண்டன் வீராங்கனை துளசிமதி முருகேசன் பேசியதாவது:

பாரா ஒலிம்பிக் போட்டியில் வெள்ளிப் பதக்கம் வென்றேன். கடந்த ஒன்றரை ஆண்டுகளில் 15 நாடுகளுக்குச் சென்று வந்துவிட்டேன். இதுவரை 16 தங்கப்பதக்கம், 11 வெள்ளிப் பதக்கங்கள் வென்றுள்ளேன். அரசு மைதானத்தில்தான் பயிற்சி எடுத்தேன். தனியாா் மையங்கள் எங்கும் சென்று பயிற்சி பெற்றதில்லை. அப்பா தான் எனது பயிற்சியாளா். அரசு சலுகைகளைப் பயன்படுத்தி, இந்த அளவுக்கு முன்னேறி வந்துள்ளேன் என்பதை நினைக்கும்போது பெருமையாக உள்ளது என்றாா்.