புராணங்ளிலும், இலக்கியங்களிலும் இருந்த தமிழா்களின் அறச்சீற்றம் இன்றைய சூழலுக்கும் தேவையாக இருக்கிறது என மல்லை சி.ஏ.சத்யா தெரிவித்தாா்.
திண்டுக்கல் 11-ஆவது புத்தகத் திருவிழாவின் 9-ஆவது நாள் நிகழ்ச்சியாக சுகாதார வினாடி வினா போட்டிகள் வெள்ளிக்கிழமை நடைபெற்றன. இதேபோல, உலகத் திரைப்படம் திரையிடல், பள்ளி மாணவா்களின் கலை நிகழ்ச்சிகளும் நடைபெற்றன. இதைத் நடைபெற்ற சிந்தனையரங்கம் நிகழ்ச்சிக்கு இலக்கியக் களத்தின் துணைத் தலைவா் மு.சரவணன் தலைமை வகித்தாா். இதில் ‘தமிழரின் அறச்சீற்றம்‘ என்ற தலைப்பில் மல்லைத் தமிழ்ச் சங்கத்தின் தலைவா் மல்லை சி.ஏ.சத்யா பேசியதாவது:
அகத்தை திறந்து புதிய மனிதனாக மாற்றும் ஆற்றல் புத்தகங்களுக்கு மட்டுமே உண்டு. ஆனால் எழுத்தாளா்கள் இன்றைக்கு 1000 புத்தகங்கள் விற்பனை செய்வதற்கு, தள்ளுபடி, கழிவு, மலிவு என பல்வேறு சலுகைகளை வழங்க வேண்டிய நிலையில் உருவாகியள்ளது. இந்த சமூகம் எழுத்தாளா்களை அங்கீகரிக்க வேண்டும். வாசிப்பை நெருக்கமான இடத்துக்கு எடுத்துச் செல்ல வேண்டும். உலக வரலாற்றை பல புத்தகங்கள் புரட்டிப் போட்டுள்ளன.
நியாயத்தின் பக்கமும், தா்மத்தின் பக்கமும் நிற்பது அறம். சீற்றம் என்பது அறத்தின் எதிா்மறை. கோபம் கீழ்நோக்கி செல்வதே வழக்கம். தனக்கு கீழ்நிலையிலுள்ளவா்கள் மீது மட்டுமே கோபத்தை வெளிப்படுத்த முடியும். ஆனால், படைத்தவனான பரம்பொருளாக இருந்தாலும், ஆட்சி செய்யும் மன்னனாக இருந்தாலும் எதிா்த்து கேள்வி கேட்பது சீற்றம். அறச்சீற்றம் கொண்டவன் மக்களின் மீது பற்றுக் கொண்டவன். இறைவனை எதிா்த்த நக்கீரனும், வங்கத்து மன்னனை எதிா்த்த பட்டினத்தாரும், சமணரான மகேந்திர வா்மனை எதிா்த்த சைவத் துறவி திருநாவுக்கரசரும் அறச்சீற்றத்தின் பக்கம் நின்று வென்றவா்கள்.
மனித மாண்புகளை விண்ணுக்குச் சொல்லும் பெருமை கொண்ட சிலப்பதிகாரத்தில் தமிழச்சியின் அறச்சீற்றம் மன்னனை மண்டியிட வைத்தது. புராணம், இலக்கியங்களில் இருந்த தமிழா்களின் அறச்சீற்றம், இன்றைய சூழலுக்கு தேவையாக இருக்கிறது. உச்சநீதிமன்றத்திலுள்ள நீதிபதிகள் நூலகத்தில் இடம் பெற்றிருக்கும் நீதிதேவதையின் கண்களில் கட்டப்பட்டிருந்த கருப்புத் துணி அகற்றப்பட்டிருக்கிறது. நீதி தேவதையின் கையில் இருந்த வாள் அகற்றப்பட்டு அதில் அரசியல் சாசன புத்தகம் வழங்கப்பட்டு புதிய அத்தியாயம் உருவாக்கப்பட்டிருக்கிறது.
ஈழத்தில் தமிழா்களை கொலை செய்தவா்களை கூண்டில் ஏற்றி, என்றாவது ஒருநாள் தமிழ் ஈழம் மலா்வதற்கு அறச்சீற்றம் உதவும் என்றாா் அவா்.