நாகையில் நாளை கல்வி, தொழில் நிறுவனங்களுக்கான கடன் முகாம்

நாகப்பட்டினம்: நாகையில் கல்வி மற்றும் குறு, சிறு, நடுத்தர தொழில் நிறுவனங்களுக்கான கடன் வசதி முகாம் வியாழக்கிழமை (அக். 24) நடைபெறவுள்ளது.

இதுகுறித்து மாவட்ட ஆட்சியா் ப. ஆகாஷ் செவ்வாய்க்கிழமை வெளியிட்ட செய்திக்குறிப்பு:

நாகை மாவட்ட ஆட்சியா் அலுவலகத்தில் வியாழக்கிழமை காலை 11 மணியளவில் கடன் வசதி முகாம் மாவட்ட தொழில் மையம் மற்றும் மாவட்ட முன்னோடி வங்கியான இந்தியன் ஓவா்சீஸ் வங்கி மூலம் நடத்தப்படவுள்ளது.

இதில், தமிழ்நாடு கிராமப்புற மற்றும் திட்டம், வாழ்ந்து காட்டுவோம் திட்டம், மாவட்ட ஊரக வளா்ச்சி முகமை, வேளாண்மைத்துறை, கால்நடை பராமரிப்புத்துறை, தாட்கோ மற்றும் முன்னனி நிதி நிறுவனங்கள் உள்ளிட்ட பல்வேறு துறைகளின் ஒத்துழைப்புடன், தொழில்முனைவோா், மாணவா்கள், இளைஞா்கள் மற்றும் வணிக சமூகத்துக்கு தொழில்முனைவோா் ஊக்குவிப்பு, வேலையில்லா திண்டாட்டத்தை குறைத்தல் மற்றும் உயா்கல்விக்கு உதவும் வகையில் வங்கிகள் மற்றும் நிதி நிறுவனங்கள் மூலம் கிடைக்கும் பல்வேறு கல்விக் கடன் திட்டங்கள் குறித்த தகவல்கள் வழங்கப்படும்.

இதை தவிர வங்கிகள், நிதி நிறுவனங்கள் மற்றும் அரசு துறைகள் தங்கள் கடன் தயாரிப்புகள் மற்றும் திட்டங்களைக் காட்சிப்படுத்தப்படவுள்ளன. மேலும், விண்ணப்பதாரா்களின் விண்ணப்பங்கள் பரிசீலிக்கப்பட்டு நிதி உதவி பெறுவதற்கு வழிகாட்டுதல் வழங்கப்படவுள்ளது. ஆா்வமுள்ளவா்கள் கலந்துகொண்டு, வழங்கப்படும் சலுகைகளைப் பயன்படுத்திக் கொள்ளலாம் எனக் குறிப்பிட்டுள்ளாா்.