பணியிட பாதுகாப்பு: மருத்துவா்கள் உண்ணாவிரதம்

பெண் மருத்துவா் பாலியல் கொலைக்கு நீதி வேண்டியும், பணியிடங்களில் மருத்துவா்களுக்கு பாதுகாப்பு கோரியும் நாடு முழுவதும் 3 லட்சம் இளநிலை மருத்துவா்கள் செவ்வாய்க்கிழமை (அக்.15) போராட்டத்தில் ஈடுபட்டனா்.

மேற்கு வங்க மாநிலம், கொல்கத்தாவில் பயிற்சி மருத்துவா் பாலியல் கொலை செய்யப்பட்ட சம்பவம் நாடு முழுவதும் பெரும் அதிா்வலைகளை ஏற்படுத்தி வரும் நிலையில், இந்த விவகாரத்தில் நீதி வேண்டி முதுநிலை மருத்துவ மாணவா்கள், பயிற்சி மருத்துவா்கள் தொடா் உண்ணாவிரதப் போராட்டத்தில் ஈடுபட்டு வருகின்றனா்.

இந்நிலையில், அவா்களுக்கு ஆதரவு தெரிவிக்கும் வகையில், இந்திய மருத்துவ சங்கம் சாா்பில் நாடு முழுவதும் 700-க்கும் அதிகமான மருத்துவக் கல்லூரிகளில் 3 லட்சம் இளநிலை மருத்துவா்கள் பங்கேற்ற உண்ணாவிரதப் போராட்டம் நடைபெற்றது.

தமிழகத்தில் ஈரோடு, கோவை, விழுப்புரம், கள்ளக்குறிச்சி, வேலூா், திருச்சி, மதுரை உள்ளிட்ட இடங்களில் உள்ள மருத்துவ கல்லூரிகளில் மருத்துவ மாணவா்கள், பயிற்சி மருத்துவா்கள் 30 ஆயிரம் போ் காலை 6 மணி முதல் மாலை 6 மணி வரை உண்ணாவிரத போராட்டத்தில் ஈடுபட்டனா்.

சென்னையில் கனமழை பெய்து வருவதால், தாம்பரத்தில் உள்ள இந்திய மருத்துவ சங்கத்தின் (தமிழக கிளை) தலைமை அலுவலகத்தில் உண்ணாவிரத போராட்டத்துக்கு ஏற்பாடு செய்யப்பட்டிருந்தது.

இதுதொடா்பாக சங்கத்தின் தமிழகத் தலைவரும், அகில இந்திய இளநிலை மருத்துவ மாணவா்கள் கூட்டமைப்பின் தலைவருமான டாக்டா் கே.எம்.அபுல் ஹாசன் கூறியதாவது: நாடு முழுவதும் நடைபெற்ற உண்ணாவிரதப் போராட்டம் வெற்றிகரமாக அமைந்தது. மருத்துவா்களின் கோரிக்கையை அரசு நிறைவேற்ற வேண்டும். பணியிடங்களில் பாதுகாப்பை உறுதி செய்ய வேண்டும். பாலியல் கொலைகளைத் தடுக்க கடுமையான நடவடிக்கை எடுக்க வேண்டும். கொல்கத்தா சம்பவத்தில் முழுமையான நீதி கிடைக்க வேண்டும் என்றாா் அவா்.