மருத்துவமனைகளில் ஓஆா்எஸ் விநியோகம்: சுகாதாரத் துறை அறிவுறுத்தல்

அதிகரித்து வரும் வெப்ப நிலையை எதிா்கொள்ளும் வகையில் அனைத்து மருத்துவ கட்டமைப்புகளிலும் உப்பு-சா்க்கரை கரைசல் விநியோக (ஓஆா்எஸ் காா்னா்) வசதிகளை மேற்கொள்ளுமாறு பொது சுகாதாரத் துறை இயக்குநா் டாக்டா் செல்வவிநாயகம் தெரிவித்துள்ளாா்.

இதுதொடா்பாக அனைத்து மாவட்ட சுகாதாரத் துறை அதிகாரிகளுக்கும் அவா் அனுப்பிய சுற்றறிக்கை: பருவநிலை மாற்றம் தொடா்பாக மாவட்ட சிறப்பு செயல் திட்டக் குழு நிலையிலான கூட்டங்களை நடத்தி ஆலோசித்தல் அவசியம். சுகாதாரக் களப் பணியாளா்கள், மருத்துவத் துறையினருக்கு வெப்ப அலை குறித்த விழிப்புணா்வை ஏற்படுத்த வேண்டும்.

போதிய எண்ணிக்கையில் உப்பு சா்க்கரை கரைசல் (ஓஆா்எஸ்) பாக்கெட்டுகளை கொள்முதல் செய்ய வேண்டும். அதேபோன்று அத்தியாவசிய மருந்துகள், ரத்த நாளங்கள் வழியே செலுத்தப்படும் திரவ மருந்துகளும் போதிய கையிருப்பு இருப்பதை உறுதி செய்ய முக்கியம்.

அனைத்து மருத்துவக் கட்டமைப்புகளிலும் குடிநீா் வசதிகள் தடையின்றி கிடைத்தல் அவசியம். ‘ஹீட் ஸ்ட்ரோக்’ எனப்படும் வெப்ப வாத பாதிப்புக்குள்ளானவா்களுக்கு மருத்துவ வழிகாட்டுதல்களின்படி துரித சிகிச்சைகளை மேற்கொள்வதற்கான வசதிகள் தயாா் நிலையில் இருக்க வேண்டும்.

மருத்துவமனைகளில் மின்சாரம் தடையின்றி கிடைப்பதை உறுதி செய்ய வேண்டும். வெப்ப அலை பாதிப்புகள் தொடா்பான தரவுகளையும், விவரங்களையும் சேகரித்து அதன் அடிப்படையில் சுகாதாரக் குழுவினா் செயல்படுத்துவது அவசியம்.

மருந்துகள், தடுப்பூசிகளை குறைந்த தட்பவெப்ப நிலையில் சேமிப்பதற்கான குளிா்பதனக் கட்டமைப்புகள் முறையாக இருப்பது முக்கியம். திறந்த வெளி நிகழ்ச்சிகளை பகல் வேளைகளிலும், அதிக வெப்பநிலை நிலவும் நேரங்களிலும் நடத்துவதைத் தவிா்க்க வேண்டும்.

அனைத்து மருத்துவமனைகள், சுகாதார நிலையங்களிலும் ஓஆா்எஸ் காா்னா் எனப்படும் உப்பு-சா்க்கரை கரைசல் விநியோக வசதிகளை ஏற்படுத்த வேண்டும் எனத் தெரிவிக்கப்பட்டுள்ளது.