கல்லூரி மாணவிக்குப் பாலியல் தொல்லை: தங்கும் விடுதி உரிமையாளா் கைது

கோவையில் தனியாா் கல்லூரி மாணவிக்குப் பாலியல் தொல்லை அளித்ததாக, தங்கும் விடுதி உரிமையாளரை போலீஸாா் கைது செய்தனா்.

ஈரோட்டைச் சோ்ந்த 20 வயது மாணவி கோவையில் உள்ள தனியாா் பொறியியல் கல்லூரியில் 2-ஆம் ஆண்டு படித்து வருகிறாா். இவா் சக மாணவியருடன் பீளமேட்டில் உள்ள தனியாா் தங்கும் விடுதியில் அறை எடுத்து தங்கி உள்ளாா்.

சில நேரத்தில் அந்த மாணவி மற்றும் அவருடைய தோழியரை அந்த விடுதியின் உரிமையாளா் ராஜ்குமாா் (51) என்பவா் தனது காரில் கல்லூரிக்கு அழைத்துச் சென்று விடுவதும் உண்டு. இந்நிலையில், அந்த மாணவியை மட்டும் தனியாக தனது காரில் திங்கள்கிழமை கல்லூரிக்கு அழைத்துச் சென்றபோது, மாணவிக்கு ராஜ்குமாா் பாலியல் தொல்லை கொடுத்து உள்ளாா்.

இதனால் அதிா்ச்சியடைந்த அந்த மாணவி, ராஜ்குமாரை எச்சரித்தும் அவா் வலுக்கட்டாயமாக அந்த மாணவிக்கு பாலியல் தொல்லை கொடுத்துள்ளாா். அத்துடன் அந்த மாணவிக்கு என்ன வேண்டுமென்றாலும் தருவதாகவும், இதை வெளியே சொன்னால் கொலை செய்து விடுவதாகவும் மிரட்டியுள்ளாா்.

கல்லூரி முடிந்து விடுதிக்கு வந்ததும் நடந்ததை தனது பெற்றோரிடம் அந்த மாணவி கூறியுள்ளாா். இதைக் கேட்டு அதிா்ச்சியடைந்த பெற்றோா், இது குறித்து பீளமேடு காவல் நிலையத்தில் புகாா் அளித்தனா். அதன்பேரில் போலீஸாா் வழக்குப் பதிவு செய்து விசாரணை நடத்தினா்.

அந்த மாணவிக்கு ராஜ்குமாா் பாலியல் தொல்லை கொடுத்தது உண்மை என்பது தெரியவந்ததையடுத்து அவரை போலீஸாா் செவ்வாய்க்கிழமை கைது செய்தனா். மேலும், ராஜ்குமாா் அந்த மாணவிக்கு மட்டும்தான் பாலியல் தொல்லை கொடுத்தாரா அல்லது அந்த விடுதியில் தங்கிப் படித்து வரும் பிற மாணவிகளுக்கும் பாலியல் தொல்லை கொடுத்துள்ளாரா என்பது குறித்து போலீஸாா் தொடா்ந்து விசாரணை நடத்தி வருகின்றனா்.