துப்பாக்கிச் சுடுஅம் போட்டியில் கேபிஆா் கல்லூரி என்சிசி அதிகாரி முதலிடம்

என்சிசி அதிகாரிகளுக்கான பயிற்சி முகாமில் அண்மையில் நடைபெற்ற துப்பாக்கிச் சுடும் போட்டியில் கோவை கேபிஆா் கலை, அறிவியல், ஆராய்ச்சிக் கல்லூரியின் என்சிசி அதிகாரி முதலிடம் பிடித்துள்ளாா்.

இது குறித்து கல்லூரி நிா்வாகம் கூறியிருப்பதாவது, மகாராஷ்டிர மாநிலம் நாக்பூரில் உள்ள என்சிசி அதிகாரிகளுக்கான பயிற்சி அகாதெமியில் நாட்டின் பல்வேறு மாநிலங்களைச் சோ்ந்த ராணுவம், கப்பல், விமானப்படை உள்ளடக்கிய 17 துறைகளைச் சோ்ந்த சாா்ந்த சுமாா் 520 கேடட் அதிகாரிகளுக்கு 3 மாத பயிற்சி முகாம் அண்மையில் நடைபெற்றது.

இதில் தமிழ்நாட்டில் இருந்து 40 கேடட் அதிகாரிகள் பங்கு பெற்றனா். இதில், உடற்பயிற்சி, யோகப் பயிற்சி, தலைமைத்துவ பயிற்சிகள், ஆளுமை மேம்பாட்டுக்கான திறன்வளா் பயிற்சிகள், பேரிடா் மேலாண்மையுடன் கூடிய ராணுவ விழிப்புணா்வு பயிற்சிகள் வழங்கப்பட்டன. இதைத் தொடா்ந்து தகுதிவாய்ந்த கேடட் அதிகாரிகளுக்கு லெப்டினண்ட் ரேங்க் வழங்கப்பட்டது.

அதைத் தொடா்ந்து கேடட் அதிகாரிகளுக்குப் பல்வேறு போட்டிகள் நடத்தப்பட்டன. இந்த பயிற்சி முகாமில் பங்கேற்ற கேபிஆா் கலை, அறிவியல், ஆராய்ச்சிக் கல்லூரியின் என்சிசி அதிகாரி லெப்டினண்ட் எஸ்.ஸ்ரீதா், க்ரூப்பிங் துப்பாக்கிச் சுடும் போட்டியில் முதலிடம் பிடித்தாா்.

இவருக்கு கேபிஆா் கல்விக் குழுமத்தின் தலைவா் கே.பி.ராமசாமி, கலைக் கல்லுரியின் செயலா் காயத்ரி அனந்தகிருஷ்ணன், முதல்வா் பி.கீதா உள்ளிட்டோா் பாராட்டினா்.