கொலை வழக்கில் லஞ்சம்: காவல் ஆய்வாளா் பணியிடை நீக்கம்; விழுப்புரம் டிஐஜி நடவடிக்கை

கடலூா் மாவட்டம், மங்கலம்பேட்டை அருகே நிகழ்ந்த கொலை வழக்கிலிருந்து ஊராட்சி மன்றத் தலைவரின் மகனை விடுவிப்பதற்கு லஞ்சம் பெற்ாக காவல் ஆய்வாளரை சனிக்கிழமை பணியிடை நீக்கம் செய்து விழுப்புரம் சரக டிஐஜி உத்தரவிட்டாா்.

மங்கலம்பேட்டையை அடுத்துள்ள மாத்தூா் கிராமத்தில் வசித்து வந்தவா் பக்கிரி மகன் பாக்யராஜ் (40). பெயிண்டரான இவரும், மாத்தூா் ஊராட்சி மன்றத் தலைவா் சுப்பிரமணியத்தின் மகன் கலைவாணன் (எ) ராம்கியும் (38) நண்பா்கள். இவா்களிடையே கடந்த ஜூன் மாதம் மது அருந்தியபோது தகராறு ஏற்பட்டதாம்.

இதையடுத்து ஊராட்சி மன்றத் தலைவா் சுப்பிரமணியன், அவரது மகன்கள் கலைவாணன், மணிமாறன் ஆகியோா் பாக்யராஜை தாக்கினராம். இதில், அவா் உயிரிழந்தாா்.

இதுதொடா்பாக மங்கலம்பேட்டை போலீஸாா் வழக்குப் பதிந்து சுப்பிரமணியன், கலைவாணன் ஆகியோரை கைது செய்தனா்.

தனிடையே, வழக்கில் இருந்து மணிமாறனை விடுவிக்க ஊராட்சி மன்றத் தலைவரின் தரப்பினா்கள், மங்கலம்பேட்டை காவல் ஆய்வாளா் சந்திரசேகரனிடம் குறிப்பிட்ட தொகையை லஞ்சமாகக் கொடுத்தனராம். இதனிடையே, மீதி பணத்தைக் கேட்டு ஆய்வாளா் சந்திரசேகரன் மிரட்டல் விடுத்தாராம்.

இதுதொடா்பாக காவல்துறை உயா் அதிகாரிகளுக்கு புகாா் அளிக்கப்பட்டது. இதுகுறித்து நடத்தப்பட்ட விசாரணையில், ஆய்வாளா் சந்திரசேகரன் லஞ்சம் வாங்கியது தெரியவந்தது. இதையடுத்து, மங்கலம்பேட்டை காவல் ஆய்வாளா் சந்திரசேகரனை பணியிடை நீக்கம் செய்து விழுப்புரம் சரக டிஐஜி. திஷா மிட்டல் சனிக்கிழமை உத்தரவிட்டாா்.