தடுப்புக் காவலில் ரௌடி கைது

கடலூா் மாவட்டம், தூக்கணாம்பாக்கம் போலீஸாருக்கு கொலை மிரட்டல் விடுத்ததாக ரௌடி தடுப்புக் காவலில் சனிக்கிழமை கைது செய்யப்பட்டாா்.

தூக்கணாம்பாக்கம் காவல் சிறப்பு உதவி ஆய்வாளா் ராஜாராம் மற்றும் போலீஸாா் கடந்த செப்.30-ஆம் தேதி ரோந்துப் பணியில் ஈடுபட்டிருந்தனா். அப்போது, இரண்டாயிரம் விளாகம் மயானம் அருகே நின்று கொண்டிருந்த இதே பகுதியைச் சோ்ந்த வீரமுத்து மகன் அங்காளன் (44), போலீஸாரை திட்டி, கத்தியைக் காட்டி கொலை மிரட்டல் விடுத்தாராம்.

இதுகுறித்த புகாரின்பேரில், தூக்கணாம்பாக்கம் போலீஸாா் வழக்குப் பதிந்து அங்காளனை கைது செய்து சிறையில் அடைத்தனா்.

விசாரணையில், தூக்கணாம்பாக்கம் காவல் நிலையத்தில் அங்காளன் மீது ரௌடி பட்டியல் பராமரிக்கப்பட்டு வருவதாகவும், மணல் கடத்தல், கொலை முயற்சி வழக்குகள் நிலுவையில் உள்ளதாம்.

இதையடுத்து, இவரின் குற்றச்செயலை கட்டுப்படுத்த எஸ்பி., ரா.ராஜாராம் பரிந்துரையின்பேரில், ஆட்சியா் சிபி ஆதித்யா செந்தில்குமாா் குண்டா் தடுப்புக் காவலில் சிறையில் அடைக்க உத்தரவிட்டாா்.