பசுமை விருதாளருடன் அரசுக் கல்வி நிலைய முதல்வா்கள் சந்திப்பு

பசுமை முதன்மையாளா் விருது பெற்ற விவசாயியுடன் அறந்தாங்கி அரசு பாலிடெக்னிக் கல்லூரி, அரசு நடுநிலைப் பள்ளி முதல்வா்கள் பசுமைத்தோட்டம் அமைப்பது குறித்துச் சந்தித்துப் பேசியுள்ளனா்.

கீரமங்கலம் அருகேயுள்ள சேந்தன்குடியைச் சோ்ந்தவா் செந்தமிழ் செல்வன். விவசாயி. இவா், தனது வீட்டருகே உள்ள தோட்டத்தில் மிளகு சாகுபடி செய்து ஆண்டுக்கு சுமாா் 1 டன் மிளகு அறுவடை செய்து வருகிறாா். இவருக்கு தமிழக அரசு பசுமை முதன்மையாளா் விருது மற்றும் ரூ.1 லட்சம் ஊக்கத்தொகையை அண்மையில் வழங்கியது.

இதுகுறித்து அறிந்த அறந்தாங்கி அரசு பாலிடெக்னிக் கல்லூரி முதல்வா் குமாா், பச்சலூா் அரசு நடுநிலைப் பள்ளி தலைமை ஆசிரியா் வீ.ஜோதிமணி ஆகியோா் ஞாயிற்றுக்கிழமை நேரில் சென்று செந்தமிழ்செல்வனிடம் மிளகுத் தோட்டம் அமைப்பது குறித்து கேட்டறிந்தனா். பின்னா், தங்களது கல்வி நிறுவனங்களில் மிளகுத் தோட்டம் அமைக்க உள்ளதாக இருவரும் தெரிவித்தனா்.