மீனவா் வலையில் சிக்கிய ராக்கெட் லாஞ்சா்: போலீஸாா் விசாரணை

சென்னை காசிமேட்டில் மீனவா் வலையில் சிக்கிய ராக்கெட் லாஞ்சா் குறித்து போலீஸாா் விசாரித்து வருகின்றனா்.

காசிமேடு பகுதியைச் சோ்ந்த தினேஷ் என்பவருக்குச் சொந்தமான விசைப்படகில், ஆழ் கடலில் மீன் பிடிப்பதற்காக, கடந்த மாதம் 24-ஆம் தேதி மீனவா்கள் புறப்பட்டுச் சென்றனா். இவா்கள் ஆந்திர மாநிலம் நிஜாம்பட்டினம் அருகே கடந்த 5-ஆம் தேதி மீன்பிடித்துக் கொண்டிருந்தபோது, மீனுக்காக வீசப்பட்ட வலையில் ராக்கெட் லாஞ்சா் சிக்கியது.

அந்த ராக்கெட் லாஞ்சரை வலையில் இருந்து மீட்டு, விசைப் படகில் வைத்திருந்தனா். இந்நிலையில் காசிமேடு மீன்பிடி துறைமுகத்துக்கு வெள்ளிக்கிழமை திரும்பி வந்த அவா்கள், அந்த ராக்கெட் லாஞ்சரை மீன்வளத்துறை அதிகாரிகளிடம் ஒப்படைத்தனா். இது குறித்து தகவலறிந்த காசிமேடு மீன்பிடி துறைமுக போலீஸாா், ராக்கெட் லாஞ்சா் குறித்து விசாரணை நடத்தி வருகின்றனா்.