Sanju Samson: ``ரோஹித் என்னிடம் மன்னிப்பு கேட்டார்...'' - சஞ்சு சாம்சன் கூறியதென்ன?

17 வருடங்கள் கழித்து ஐசிசி 2024 டி20 உலகக் கோப்பையை ரோஹித் சர்மா தலைமையிலான இந்திய அணி வென்று சாதனை படைத்திருந்தது.

இந்த உலகக் கோப்பையில் இந்திய அணிக்காக சஞ்சு சாம்சன் விளையாட தேர்வு செய்யப்பட்டிருந்தார். ஆனால் போட்டிகளில் விளையாடுவதற்கான வாய்ப்பு அவருக்கு கிடைக்கவில்லை. இந்நிலையில் இதுகுறித்து சமீபத்திய பேட்டி ஒன்றில் பேசிய சாம்சன், “ஃபைனலில் விளையாட தயாராக இருக்குமாறு என்னிடம் சொன்னார்கள். ஆனால் வாய்ப்பு கிடைக்கவில்லை. அணியில் விளையாட வைக்காததற்காக டாஸ் முடிந்த பிறகு வந்து ரோஹித் பாய் என்னிடம் மன்னிப்பு கேட்டார்.

மேலும் என்னை அழைத்துச் சென்று அந்த முடிவை பற்றி புரிய வைத்தார். அப்போது முதலில் நாம் போட்டியை வெல்வோம். பின்னர் இது பற்றி பேசலாம். நீங்கள் போட்டியில் கவனம் செலுத்துங்கள் என்று அவரிடம் சொன்னேன். ஒரு நிமிடம் கழித்து மீண்டும் என்னிடம் வந்த ரோஹித் பாய் மனதிற்குள் நீங்கள் எனக்கு சாபம் விடுகிறீர்கள் என்பது எனக்குத் தெரியும். நீங்கள் மகிழ்ச்சியாக இல்லை என்பது போல் நான் உணர்கிறேன் என்று சொன்னார்.

அவரிடம் ஒரு வீரராக நான் விளையாடவே விரும்புகிறேன் என்று சொன்னேன். ஏனெனில் சிறு வயது முதலே அதற்காக நான் காத்திருந்தேன். ரோஹித் சர்மா போன்ற ஒருவர் தலைமையில் விளையாடாதது வாழ்நாள் முழுவதும் எனக்கு வருத்தமாகவே இருக்கும். இருப்பினும் அணிக்காக அவர் அந்த முடிவை எடுத்தார்.

ஆனால் அப்போது மற்ற வீரர்களிடம் கவனத்தை செலுத்தாமல் அவர் அந்த முடிவு பற்றி என்னிடம் அதை விளக்குவதில் கவனம் செலுத்தினார். அந்த தருணத்தில் என் இதயத்தில் ஒரு இடத்தை வென்று விட்டார்" என்று நெகிழ்ச்சியாகப் பேசியிருக்கிறார்.