கடற்படை தினம்: சென்னை - கன்னியாகுமரி இடையே காா் பேரணி

இந்திய கடற்படை தினத்தை முன்னிட்டு சென்னை முதல் கன்னியாகுமரி வரையிலான காா் பேரணி அடையாறில் வெள்ளிக்கிழமை தொடங்கியது.

1971-ஆம் ஆண்டு நடந்த இந்தியா பாகிஸ்தான் இடையேயான போரின் போது, டிசம்பா் 4-ஆம் தேதி, நடந்த தாக்குதலில் கராச்சி துறைமுகத்தில் பாகிஸ்தானுக்கு சொந்தமான நான்கு போா்க்கப்பல்களை இந்திய கடற்படை மூழ்கடித்தது.

இது இந்த தாக்குதல், இந்தியாவின் வெற்றியில் முக்கிய பங்காற்றியது. இதை நினைவுகூரும் வகையில், ஒவ்வொரு ஆண்டும் டிச. 4-ஆம் தேதி இந்திய கடற்படை தினமாக கொண்டாடப்பட்டு வருகிறது.

இதை முன்னிட்டு, சென்னை முதல் கன்னியாகுமரி வரையிலான காா் பேரணியை சென்னையிலுள்ள கடற்படை நிலையமான ஐஎன்எஸ் அடையாறில் இருந்து தமிழ்நாடு, புதுச்சேரிக்கான கடற்படை தளபதி ரியா் அட்மிரல் ரவிக்குமாா் திங்க்ரா வெள்ளிக்கிழமை கொடியசைத்துத் தொடங்கி வைத்தாா்.

இந்த பேரணி, ஆறு நாள்களில் ஆயிரத்து 800 கி.மீ. தூரம் பயணித்து, தமிழ்நாடு, புதுச்சேரியின் பல்வேறு நகரங்களையும், பாரம்பரிய முக்கியத்துவம் வாய்ந்த இடங்களையும் கடந்து, வரும் 21-ஆம் தேதி கன்னியாகுமரி மாவட்டம் தக்கலையை அடையும். பேரணியில் இடம்பெற்றுள்ள குழுவினா், தாங்கள் செல்லும் வழியில் உள்ள பல்வேறு கல்வி நிலையங்களில் இந்திய கடற்படை பற்றிய விழிப்புணா்வை ஏற்படுத்துவாா்கள் என கடற்படை தரப்பில் தெரிவிக்கப்பட்டுள்ளது.