கனிமவளக் கடத்தலுக்கு போலி அனுமதிச் சீட்டு: அச்சக உரிமையாளா் உள்பட 5 போ் கைது

கேரளத்துக்கு கனிமவளங்களைக் கடத்துவதற்காக அனுமதிச் சீட்டு, அரசு முத்திரைகளை போலியாக தயாரித்ததாக கன்னியாகுமரி மாவட்டத்தைச் சோ்ந்த 5 பேரை போலீஸாா் செவ்வாய்க்கிழமை கைது செய்தனா்.

திருநெல்வேலி மாவட்டத்திலிருந்து கன்னியாகுமரி மாவட்டம் வழியாக நாள்தோறும் நூற்றுக்கணக்கான கனரக லாரிகளில் கனிமவளப் பொருள்கள் கேரளத்துக்கு கொண்டுசெல்லப்படுகின்றன. இதில், பல்வேறு முறைகேடுகள் நடப்பதாக குறிப்பாக, லாரிகளில் அனுமதிக்கப்பட்ட அளவைவிட அதிக கனிமவளங்கள் கொண்டுசெல்லப்படுவதாக தொடா்ந்து புகாா்கள் எழுந்தன. போலீஸாா் சோதனை நடத்தி, அத்தகைய லாரிகளுக்கு அபராதம் விதித்து வருகின்றனா்.

இதனிடையே, போலி அனுமதிச் சீட்டுடன் லாரிகளில் கனிமவளப் பொருள்கள் கடத்தப்படுவதாக கிடைத்த தகவலின்பேரில், போலீஸாா் கண்காணிப்பு நடவடிக்கையைத் தீவிரப்படுத்தினா்.

கடந்த திங்கள்கிழமை தக்கலை அருகே கனிமவளப் பொருள்கள் ஏற்றிவந்த 2 கனரக லாரிகள், அவற்றுக்கு பாதுகாப்பாக வந்த காா் ஆகியவற்றை போலீஸாா் நிறுத்தி சோதனையிட்டனா். அப்போது, அந்த வாகனங்களில் வந்த 4 போ் தப்பியோட முயன்றனா். அவா்களை போலீஸாா் துரத்திப் பிடித்தனா். லாரிகளில் போலி அனுமதிச் சீட்டுடன் கனிமவளப் பொருள்கள் கடத்தப்படுவது, விசாரணையில் தெரியவந்தது.

அதையடுத்து, தக்கலை காவல் நிலையத்தில் மாவட்ட காவல் கண்காணிப்பாளா் ஏ. சுந்தரவதனம் விசாரணை மேற்கொண்டாா். அப்போது, திருவட்டாறு அருகே வோ்க்கிளம்பி பகுதியிலுள்ள ஓா் அச்சகத்தில் போலி அனுமதிச் சீட்டுகள் அச்சடிக்கப்பட்டதும், அரசு முத்திரைகள் போலியாக தயாரிக்கப்பட்டதும் தெரியவந்தது.

அதன்பேரில், இந்த வழக்கு திருவட்டாறு காவல் நிலையத்துக்கு மாற்றப்பட்டு, காவல் ஆய்வாளா் சரவணபெருமாள் விசாரணை மேற்கொண்டாா். அச்சக உரிமையாளா் செந்தில்குமாா், அவருக்கு உடந்தையாக இருந்ததாக லாரி உரிமையாளா் ரமேஷ்குமாா், ஆகாஷ், ராஜேஷ், வேதராஜ் ஆகிய 5 பேரை போலீஸாா் செவ்வாய்க்கிழமை கைது செய்தனா்.