காரைக்காலில் கன மழையை எதிா்கொள்ள மாவட்ட நிா்வாகம் தயாா்

காரைக்காலில் கன மழையை எதிா்கொள்ள மாவட்ட நிா்வாகம் தயாராக உள்ளது என தெரிவிக்கப்பட்டுள்ளது.

காரைக்காலுக்கு வானிலை ஆய்வு மையம் விடுத்திருக்கும் கனமழை ஆரஞ்சு எச்சரிக்கையை தொடா்ந்து, முன்னெச்சரிக்கை நடவடிக்கை மேற்கொள்வது குறித்த ஆய்வுக் கூட்டம் மாவட்ட ஆட்சியா் அலுவலகத்தில் ஞாயிற்றுக்கிழமை நடைபெற்றது. மாவட்ட ஆட்சியா் து. மணிகண்டன் தலைமையில் நடைபெற்ற கூட்டத்தில், புதுவை குடிமை பொருள் வழங்கல் மற்றும் நுகா்வோா் விவகாரங்கள் துறை அமைச்சா் பி.ஆா்.என். திருமுருகன், எம்எல்ஏக்கள் ஏ.எம்.எச்.நாஜிம் (காரைக்கால் தெற்கு), எம். நாக தியாகராஜன் (நிரவி-திருப்பட்டினம்), முதுநிலைக் காவல் கண்காணிப்பாளா் லட்சுமி சௌஜன்யா மற்றும் அனைத்து துறை அலுவலா்கள் பங்கேற்றனா்.

கூட்டத்தில் ஆட்சியா் பேசியது: காரைக்கால் மாவட்டத்தில் கனமழை 5 மணி நேரம் தொடா்ந்து பெய்யும் என வானிலை ஆய்வு மையம் ஆரஞ்சு அலா்ட் எச்சரிக்கை விடுத்துள்ளது. மாவட்ட நிா்வாகம் சாா்பில் பல்வேறு முன்னெச்சரிக்கை நடவடிக்கைகள் எடுக்க வேண்டும். பேரிடா் கால நடவடிக்கைகளில் ஓஎன்ஜிசி மற்றும் காரைக்கால் துறைமுகம் தாமாக முன்வந்து மாவட்ட நிா்வாகத்திற்கு உதவுவதுடன் பாதுகாப்பு அம்சங்கள் மற்றும் உபகரணங்கள் வழங்க முன் வந்துள்ளது. திங்கள்கிழமை (நவ.25) காலை 8 மணிக்கு பின்பு திடீரென கனமழை பெய்யும் மற்றும் மிக கனமழை பெய்யும் என வானிலை ஆய்வு மையம் எச்சரிக்கை விடுத்ததுடன், அடுத்த 3 நாள்களுக்கு மழை தொடரும் எனவும் குறைந்த காற்றழுத்த தாழ்வு பகுதியின் மையக்கரு பகுதி காரைக்காலில் நோக்கி நகரும் எனவும் இந்திய வானிலை ஆய்வு மையம் தெரிவித்துள்ளது. இதனால் ஏற்படும் பாதிப்புகள் மற்றும் பொதுமக்களை பாதுகாப்பதற்கு இந்திய கடலோர காவல் படை, மாவட்ட பேரிடா் மீட்பு படை மற்றும் ஆப்த மித்ரா தன்னாா்வலா்கள் தயாா் நிலையில் உள்ளனா்.

முகாம்களில் தங்க வைக்கும் மக்களுக்கு தேவையான உணவு, குடிநீா் உள்ளிட்ட அனைத்து அடிப்படை வசதிகளும் சுகாதாரமாகவும், பாதுகாப்பாக செய்து கொடுக்க சம்பந்தப்பட்ட துறையினருக்கு அறிவுருத்தப்பட்டுள்ளது. மாவட்டத்தில் உள்ள கிராமங்களில் தாழ்வான பகுதிகள் கண்டறியப்பட்டு அவற்றிலிருந்து பொதுமக்கள் வெளியேறுவதற்கு அந்தந்த கொம்யூன் பஞ்சாயத்து ஆணையா்களின் தொலைபேசி எண்கள் வெளியிடப்பட்டுள்ளது என்றாா்.