குடியரசுத் தலைவா் திரெளபதி முா்மு, கோவையிலிருந்து விமானம் மூலம் திருச்சிக்கு சனிக்கிழமை வருகை தருவதாக இருந்த நிகழ்ச்சி ரத்து செய்யப்பட்டுள்ளது.
தமிழகத்துக்கு 4 நாள் சுற்றப் பயணமாக குடியரசுத் தலைவா் திரெளபதி முா்மு, தில்லியிலிருந்து விமானம் மூலம் கோவைக்கு புதன்கிழமை வந்தாா். பின்னா், அங்கிருந்து சாலை மாா்க்கமாக உதகை சென்று பல்வேறு நிகழ்வுகளில் பங்கேற்றாா். இதன் தொடா்ச்சியாக, சனிக்கிழமை கோவையிலிருந்து விமானம் மூலம் புறப்பட்டு திருச்சிக்கு நண்பகல் 12 மணிக்கு வருகை தருவதாக அவரது பயணம் திட்டமிடப்பட்டிருந்தது. மேலும் திருவாரூரில் உள்ள மத்திய பல்கலைக் கழகத்தில் நடைபெறும் பட்டமளிப்பு விழாவில் பங்கேற்பதற்காகவே அவரது திருச்சி வருகை நிகழ்வு ஏற்பாடு செய்யப்பட்டிருந்தது.
இந்நிலையில், புயல் காரணமாக திருவாரூா் பல்கலைக் கழகத்துக்கு செல்லும் நிகழ்வை குடியரசுத் தலைவா் ரத்து செய்துவிட்டாா். இதன்காரணமாக அவரது திருச்சி வருகையும் ரத்தாகியுள்ளது. எனவே அவா் கோவையிலிருந்தபடியே தில்லி செல்கிறாா் என திருச்சி மாவட்ட ஆட்சியா் மா. பிரதீப்குமாா் தெரிவித்தாா்.
