சரபங்கா நதியில் வெள்ளப்பெருக்கு: அரசிராமணி செட்டிப்பட்டியில் இயல்புவாழ்க்கை பாதிப்பு

சங்ககிரி வட்டம், அரசிராமணி செட்டிப்பட்டி வழியாகச் செல்லும் சரபங்கா நதியில் ஏற்பட்ட வெள்ளப்பெருக்கையொட்டி சாலைகளில் தண்ணீா் அதிக அளவில் தேங்கி நிற்பதால் அப்பகுதியில் போக்குவரத்து பாதிப்பு ஏற்பட்டது. மேலும் இரு பள்ளிகளுக்கு புதன்கிழமை விடுமுறை அளிக்கப்பட்டது.

ஃபென்ஜால் புயலையடுத்து சேலம் மாவட்டத்தில் கடந்த சில தினங்களாக காற்றுடன் கூடிய கனமழை பெய்தது. இதனையடுத்து ஏற்காட்டிலிருந்து வரும் சரபங்கா நதியில் வெள்ளநீா் பெருக்கெடுத்து தாரமங்கலம், எடப்பாடி, அரசிராமணி செட்டிப்பட்டி, தேவூா், அண்ணமாா் கோயில் வழியாக காவிரி ஆற்றுக்கு சென்றது.

எடப்பாடியில் இருந்து அரசிராமணி செட்டிப்பட்டி வழியாக குமாரபாளையம் பவானி, ஈரோடு செல்லும் பிரதான சாலையில் சுமாா் 5 அடிக்கு வெள்ளம் தேங்கி நின்ால் செவ்வாய்க்கிழமை இரவு முதல் போக்குவரத்து நிறுத்தப்பட்டது. இதனால் வாகன ஓட்டுநா்கள் பாதிப்புக்குள்ளாகினா்.

அதேபோல அரசிராமணி செட்டிப்பட்டி பகுதியில் உள்ள விவசாய நிலங்கள், குடியிருப்பு பகுதிகள், சாலையோர மளிகைக் கடை, பேக்கரி, இரும்பு கடைகளிலும் மழைநீா் புகுந்தது. தனியாா் பால் சேகரிப்பு நிலையங்களில் வாங்கிய பாலை நகரங்களுக்கு கொண்டுசெல்ல பரிசல் மூலம் எடுத்துச் சென்று வாகனத்தில் ஏற்றி சென்றனா்.

அரசிராமணி செட்டிப்பட்டி பகுதியில் செயல்பட்டு வரும் ஊராட்சி ஒன்றிய தொடக்கப் பள்ளி, அரசு மேல்நிலைப் பள்ளி விளையாட்டு மைதானத்தில் தண்ணீா் சூழ்ந்து நின்ால் இரு பள்ளிகளுக்கும் விடுமுறை அளிக்கப்பட்டது.

சரபங்கா நதியில் ஏற்பட்ட வெள்ளப்பெருக்கு காரணமாக பத்துக்கு மேற்பட்ட தரைவழி பாலங்கள் வெள்ளநீரில் மூழ்கியதால் ஓலப்பாளையம், கந்தாயிகாடு, தைலான்காடு, வயக்காடு, சுக்லான் காடு, கல்லம்பாளையம், எல்லப்பாளையம் உள்ளிட்ட 20க்கும் மேற்பட்ட குக்கிராம மக்கள் வெளியிடங்களுக்கு செல்ல முடியாமல் தவித்து வருகின்றனா்.

வருவாய், காவல் துறையினா், அரசிராமணி செட்டிப்பட்டி, குள்ளம்பட்டி, தேவூா் உள்ளிட்ட பகுதிகளில் தடுப்புகளை ஏற்படுத்தி பொதுமக்களுக்கு வெள்ள அபாய எச்சரிக்கை செய்து பாதுகாப்புப் பணியில் ஈடுபட்டு வருகின்றனா்.